ନୂଆଦିଲ୍ଲୀ : କର୍ମଚାରୀ ଭବିଷ୍ୟ ନିଧି ପାଣ୍ଠି ସଂଗଠନ (ଇପିଏଫଓ) ୨୦୧୭-୧୮ ଆର୍ଥିକ ବର୍ଷରେ ଜମା ଇପିଏଫର ସୁଧ ହାରକୁ ହ୍ରାସ କରିଥିବା ଘୋଷଣା କରିଛି । ଜମା ଭବିଷ୍ୟ ନିଧି ପାଣ୍ଠି (ଇପିଏଫ)ର ସୁଧ ହାରକୁ ୦.୧୦% ହ୍ରାସ କରାଯାଇଛି । ଇଫିଏଫଓର ଏହି ନିଷ୍ପତ୍ତି କୋଟି କୋଟି ଚାକିରିଆଙ୍କୁ ଝଟକା ଦେଇଛି । ୨୦୧୬-୧୭ରେ ଜମା ଇପିଏଫର ସୁଧ ହାର ୮.୬୫% ଥିଲା ବେଳେ ୨୦୧୭-୧୮ ଆର୍ଥିକ ବର୍ଷରେ ଏହା ହ୍ରାସ ପାଇ ୮.୫୫%ରେ ପହଞ୍ଚିଛି ।
ଇପିଏଫଓର ଏହି ନିଷ୍ପତ୍ତି ଯୋଗୁଁ ୫ କୋଟି ଉପଭୋକ୍ତାଙ୍କ କ୍ଷତି ସହିବେ । ଭବିଷ୍ୟ ନିଧି ପାଣ୍ଠି କେନ୍ଦ୍ରୀୟ ବୋର୍ଡର ବୁଧବାର ବୈଠକରେ ଏଭଳି ନିଷ୍ପତ୍ତି ନିଆଯାଇଛି । ଆର୍ଥିକ ବର୍ଷ ଶେଷ ହେବା ବେଳକୁ ଇପିଏଫଓର କେନ୍ଦ୍ରୀୟ ବୋର୍ଡ ସୁଧ ହାର ଉପରେ ନଷ୍ପତ୍ତି ନେଇଥାଏ । ଚଳିତ ଆର୍ଥିକ ବର୍ଷ ଶେଷ ହେବାର ଗୋଟିଏ ମାସ ପୂର୍ବରୁ ଇପିଏଫଓ କେନ୍ଦ୍ରୀୟ ବୋର୍ଡ ବୈଠକରେ ଏହି ନିଷ୍ପତ୍ତି ନିଆଯାଇଛି । ୨୦୧୫-୧୬ରେ ଇପିଏଫ ସୁଧ ହାର ୮.୮% ଥିଲାବେଳେ ଏହା ୨୦୧୬-୧୭ରେ ହ୍ରାସ ପାଇ ୮.୬୫ରେ ପହଞ୍ଚିଥିଲା । ୨୦୧୭-୧୮ରେ ଏହା ପୁଣି ୦.୧୦% ହ୍ରାସ ପାଇ ୮.୫୫%ରେ ପହଞ୍ଚିଛି ।