ସର୍ବେକ୍ଷଣରୁ ଜଣାପଡ଼ିଛି ଯେ ୪୫% ଲୋକଙ୍କ ଧାରଣା ଯେ ଶୌଚାଳୟର କମୋଡ୍ କାରଣରୁ ଜୀବାଣୁ ବ୍ୟାପିଥାଏ । ପ୍ରକୃତରେ କିନ୍ତୁ ଘଟଣା କିଛି ଭିନ୍ନ । ଶୌଚାଳୟରେ ଏଭଳି ଅନେକ ଜିନିଷ ଅଛି, ଯାହା ଆମ ସ୍ବାସ୍ଥ୍ୟ ପାଇଁ ସବୁଠୁ ଅଧିକ କ୍ଷତିକାରକ ।
୬୫%ରୁ ଅଧିକ ଲୋକେ ଶୌଚାଳୟକୁ ସ୍ମାର୍ଟଫୋନ୍ ନେଇ ଯାଇଥାନ୍ତି । ହାତ ସଫା ନ କରି ମଧ୍ୟ ଅନେକ ସେଠାରେ ବସି ସ୍ମାର୍ଟଫୋନରେ କଥାବାର୍ତ୍ତା ହୁଅନ୍ତି କିମ୍ବା ନେଟ୍ ସର୍ଫିଂ କରନ୍ତି । ମୋବାଇଲ କଭର ଜରିଆରେ ହିଁ ଜୀବାଣୁ ବ୍ୟାପିଥାନ୍ତି । ସେଥିପାଇଁ ଯଦିଓ ଶୌଚାଳୟରେ ଫୋନ୍ ବ୍ୟବହାର କରୁଛନ୍ତି, ପରେ ତୁରନ୍ତ ଏହାକୁ ସଫା କରିନେବା ଉଚିତ ।
ଶୌଚାଳୟରେ ଥିବା ହ୍ୟାଣ୍ଡୱାଶ୍ କାରଣରୁ ମଧ୍ୟ ଜୀବାଣୁ ବ୍ୟାପିଥାଏ । ଏଣୁ ପ୍ରତି ସପ୍ତାହରେ ଅନ୍ତତଃ ଥରୁଟିଏ ଏହି ହ୍ୟାଣ୍ଡୱାଶକୁ ଭଲଭାବେ ପାଣିରେ ସଫା କରିବା ଆବଶ୍ୟକ ।
ଶୌଚାଳୟର ନଳରେ ମଧ୍ୟ ଜୀବାଣୁ ଲାଗି ରହିଥାନ୍ତି । ଭଲଭାବେ ହାତ ଧୋଇଲେ ଯେ ହାତ ସଫା ହେଲା, ଏହି ଧାରଣା ମନରୁ ବାହାର କରନ୍ତୁ । ରୀତିମତ ସ୍କ୍ରବରରେ ଏହି ନଳକୁ ସଫା କରିବା ଉଚିତ ।
ଟାୱେଲ୍ କିମ୍ବା ଲୁଗାପଟା ଥାକ ସ୍ନାନାଗାରରେ ଥିଲେ, ନିୟମିତ ତାହା ସଫା କରିବା ଭଲ । ନଚେତ୍ ସେଠାରେ ମଧ୍ୟ ଅପରିଷ୍କାର ହୋଇ ଜୀବାଣୁ ବ୍ୟାପିଥାଏ ।