ଆଠଗଡ : ଆଠଗଡ ବ୍ଲକର ୨ନଂ ଜିଲ୍ଲାପରିଷଦ ଜୋନର ୧୨ଟି ପଞ୍ଚାୟତରେ ଜିଲ୍ଲାପରିଷଦ ପାର୍ଥୀ, ସରପଞ୍ଚ, ସମିତିସଭ୍ୟ ଓ ୱାର୍ଡସଭ୍ୟ ପ୍ରାର୍ଥୀଙ୍କ ଭୋଟଗଣନା ରବିବାର ୨ୟ ଦିନରେ ଚାଲିଛି । ୨ନଂ ଜୋନର ଭୋଟ ଗଣତି ବିଳମ୍ବିତ ରାତିରେ ଶେଷ ହେବ ବୋଲି ଅନୁମେୟ। ନବମ ରାଉଣ୍ଡ ସୁଦ୍ଧା ବିଜେଡି ପ୍ରାର୍ଥୀନୀ ମିନତୀ ଗାଗରାଇ ତାଙ୍କ ନିକଟତମ ପ୍ରତିଦ୍ୱନ୍ଦୀ ବିଜେପିର ଚିନ୍ମୟୀ ପୂର୍ତ୍ତୀଙ୍କଠାରୁ ୮୭୩୪ଖଣ୍ଡ ଭୋଟରେ ଆଗୁଆ ଥିବା ଜଣାପଡିଛି । ବିଜେଡି ପ୍ରାର୍ଥୀ ମିନତୀ ୧୩୭୨୯ ଭୋଟ ପାଇଥିବାବେଳେ ବିଜେପିର ଚିନ୍ମୟୀ ୪୯୯୫ ଖଣ୍ଡ ଭୋଟ ଏବଂ କଂଗ୍ରେସ ପାର୍ଥୀ ରଞ୍ଜିତା ହେଁସା ୧୧୪୭ ଖଣ୍ଡ ଭୋଟ ପାଇ ୩ୟ ସ୍ଥାନରେ ରହିଛନ୍ତି । ଭୋଟ ବ୍ୟବଧାନକୁ ଦେଖିଲେ ବିଜେଡି ଏହି ଜିଲ୍ଲାପରିଷଦ ଆସନ ହାତେଇବା ସ୍ପଷ୍ଟ ହୋଇଯାଇଛି । ନିର୍ବାଚନ ଅଧିକାରୀ ତଥା ମଣ୍ଡଳ ଉନ୍ନୟନ ଅଧିକାରୀ ଅରୁଣ କୁମାର ଦାସ ଭୋଟ୍ ଗଣତି ପ୍ରକ୍ରିୟା ପରିଚାଳନା କରୁଥିବାବେଳେ ଉପଜିଲ୍ଲାପାଳ ହେମନ୍ତ କୁମାର ସ୍ୱାଇଁ ଏହା ଅନୁଧ୍ୟାନ କରିବା ପାଇଁ ଗୋପବନ୍ଧୁ ବିଜ୍ଞାନ କଲେଜ ପରିସରରେ ଉପସ୍ଥିତ ଅଛନ୍ତି । ସେହିପରି ତହସିଲଦାର ପ୍ରିୟବ୍ରତ ଦାସ ଆଇନ ଶୃଙ୍ଖଳା ରକ୍ଷା ପାଇଁ ମାଜିଷ୍ଟ୍ରେଟ ଭାବେ ଦାୟିତ୍ୱ ନିର୍ବାହ କରୁଥିବାବେଳେ ତ୍ରିସ୍ତରୀୟ ପୁଲିସ ସୁରକ୍ଷା ବ୍ୟବସ୍ଥା ଏସଡିପିଓ ବିଜୟ କୁମାର ବିସି ଓ ଆଇଆଇସି ବାମଦେବ ସ୍ୱାଇଁ ପରିଚାଳନା କରୁଛନ୍ତି। ଉପଖଣ୍ଡ ସୂଚନା ଓ ଲୋକସଂପର୍କ ଅଧିକାରୀ ଅଲେଖ ଚନ୍ଦ୍ର ଦାଶ ନିର୍ବାଚନ ଫଳାଫଳ ସଂପର୍କୀତ ସମସ୍ତ ତଥ୍ୟ ଗଣମାଧ୍ୟମ ପ୍ରତିନିଧିଙ୍କୁ ପ୍ରଦାନ କରିବା ପାଇଁ ସେଠାରେ ଉପସ୍ଥିତ ରହିଛନ୍ତି।
Popular Categories
Previous article
Next article