ବେଜିଂ: ସି ଜିନପିଙ୍ଗ ଆଜୀବନ ଚୀନର ରାଷ୍ଟ୍ରପତି ରହିବାର ପଥ ପରିଷ୍କାର ହୋଇଛି । ରବିବାରରେ ସଂସଦରେ ବସିଥିବା ବୈଠକରେ ତାଙ୍କୁ ଏହି ଅଧିକାର ପ୍ରଦାନ କରାଯାଇଛି । ଆଗରୁ ଚୀନରେ ଥିବା ରାଷ୍ଟ୍ରପତି ହେବାର ୨ଟି କାର୍ଯ୍ୟକାଳ କଟକଣାକୁ ହଟାଇ ଦିଆଯାଇଛି । ଚୀନକୁ ଏକ ଆର୍ଥିକ ଓ ଶକ୍ତିଶାଳୀ ଦେଶରେ ପରିଣତ କରିବା ପାଇଁ ତାଙ୍କୁ ଏହି ଦାୟିତ୍ୱ ଦିଆଯାଇଥିବା କୁହାଯାଇଛି । ପୂର୍ବରୁ ଚୀନର ପ୍ରତିଷ୍ଠାତା ମାଓ ଜେଦୋଙ୍ଗଙ୍କୁ ଏହି ଅଧିକାର ଦିଆଯାଇଥିଲା ।
ଚୀନରେ ଏହି ଐତିହାସିକ ସାମ୍ବିଧାନିକ ନିଷ୍ପତ୍ତି ପାଇଁ ମତ ଦାନ କରାଯାଇଥିଲା । ଏଥିରେ ରବରଷ୍ଟାମ୍ପ ପାର୍ଲାମେଣ୍ଟର ୨୯୫୮ ଜଣ ସପକ୍ଷରେ ମତ ଦାନ କରିଥିବା ବେଳେ ୨ ଜଣ ବିରୋଧରେ ମତ ଦାନ କରିଥିଲେ, ୩ ଜଣ ସଦସ୍ୟ ଅନୁପସ୍ଥିତ ଥିଲେ ।
ସି ଜିନପିଙ୍ଗଙ୍କ କାର୍ଯ୍ୟକାଳ ୨୦୨୩ରେ ଶେଷ ହେବ । ମାତ୍ର ସମ୍ବିଧାନ ସଂଶୋଧନପରେ ଶୀର୍ଷ ପଦରେ ରହିବା ପାଇଁ ତାଙ୍କ ପାଇଁ ପଥ ପରିଷ୍କାର ହୋଇଛି । ଚୀନ ସଂସଦର ପିପୁଲସ୍ କଂଗ୍ରେସରେ ୩ହଜାର ସାସଂଦଙ୍କ ମଧ୍ୟକୁ ଦୁଇ ତୃତୀୟାଂଶ ରାଷ୍ଟ୍ରପତି ଓ ଉପ ରାଷ୍ଟ୍ରପତିଙ୍କର ପାଇଁ ଥିବା ସମୟ ସୀମା କଟକଣାକୁ ହଟାଇ ଦେଇଛନ୍ତି । ଚୀନର ପ୍ରତିଷ୍ଠାତା ମାଓ ଜୋଦାଙ୍ଗଙ୍କ ପରେ ସି ଜିନପିଙ୍ଗଙ୍କୁ ସବୁଠାରୁ ଶକ୍ତିଶାଳୀ ନେତା ବୋଲି କୁହାଯାଉଛି ।
