ନୂଆଦିଲ୍ଲୀ : କୌଣସି ପକ୍ଷୀର ପର ସୁନାଠୁ ମଧ୍ୟ ଅଧିକ ଦାମ୍ ହୋଇପାରେ ବୋଲି ଆପଣ କେବେ ଚିନ୍ତା କରିଛନ୍ତି କି ? ଯଦି ଆପଣଙ୍କ ଉତ୍ତର ନା, ତେବେ ଆପଣ ଭୁଲ୍ ଭାବୁଛନ୍ତି । ସାମାଜିକ ଗଣମାଧ୍ୟମରେ ଏମିତି ଏକ ପର ଏବେ ଲୋକଙ୍କ ଧ୍ୟାନ ଆକର୍ଷଣ କରୁଛି । ଆଶ୍ଚର୍ଯ୍ୟର କଥା ହେଉଛି ଏହି ପରର ଦାମ୍ ୨୩ ଲକ୍ଷ ଟଙ୍କା । ନିକଟରେ ନ୍ୟୁଜିଲାଣ୍ଡର ବିରଳ ହୁଇୟା ପକ୍ଷୀର ଏକ ପର ୨୮ ହଜାର ଡଲାର(୨୩ ଲକ୍ଷ ଟଙ୍କାରୁ ଅଧିକ)ରେ ନିଲାମ ହୋଇଛି । ହୁଇୟା ପକ୍ଷୀକୁ ବହୁତ ପବିତ୍ର ବୋଲି ସମସ୍ତେ ମାନିଥାନ୍ତି ।
୯ ଗ୍ରାମ ଓଜନର ଏହି ପରର ଦାମ୍ ସୁନାଠୁ ମଧ୍ୟ ଅଧିକ । ଭାରତରେ ୧୦ ଗ୍ରାମ ସୁନା ପ୍ରାୟ ୭୦ ହଜାର ଟଙ୍କା । ଅର୍ଥାତ୍ ଏହି ପରର ଦାମ୍ ପ୍ରାୟ ୩୦୦ ଗ୍ରାମ ସୁନା ସହ ସମାନ । ମାଓରି ଲୋକଙ୍କ ପାଇଁ ପବିତ୍ର ଏହି ହୁଇୟା ପକ୍ଷୀ ଅନେକ ଦଶକ ତଳୁ ବିଲୁପ୍ତ ହୋଇଯାଇଛି । ପୂର୍ବରୁ ନ୍ୟୁଜିଲାଣ୍ଡରେ ମାଓରୀ ପ୍ରମୁଖ ଏବଂ ତାଙ୍କ ପରିବାର ଲୋକେ ଏହି ପର ତିଆରି ମୁକୁଟ ପିନ୍ଧୁଥିଲେ । ଏହାକୁ ଉପହାର ଭାବେ ମଧ୍ୟ ପ୍ରଦାନ କରାଯାଉଥିଲା । କୁହାଯାଏ କି ଏହି ପର ପାଖରେ ରହିଲେ ବ୍ୟବସାୟରେ ଲାଭ ହୋଇଥାଏ । ନ୍ୟୁଜିଲାଣ୍ଡର ସଂଗ୍ରହାଳୟ ଅନୁସାରେ ହୁଇୟା ପକ୍ଷୀକୁ ଶେଷ ଥର ପାଇଁ ୧୯୦୭ ମସିହାରେ ଦେଖିବାକୁ ମିଳିଥିଲା ।
