ବଡ଼ବିଲ ଉପ କାରାଗାରରେ ଜଣେ ହତ୍ୟା ଅଭିଯୁକ୍ତ ମହିଳା କଏଦୀଙ୍କ ମର ଶରୀର ଜେଲ ଭିତରେ ଥିବା ଏକ ଗଛରୁ ଝୁଲୁଥିବା ଅବସ୍ଥାରେ ଉଦ୍ଧାର କରାଯାଇଛି । ମୃତ ମହିଳାଙ୍କ ନାମ ସବିତା ମୁଣ୍ଡା ଏବଂ ସେ ଡ଼ାହାଣୀ ସନ୍ଦେହରେ ନିଜର ଜଣେ ସମ୍ପର୍କୀୟ ମହିଳାଙ୍କୁ ଗତ ମେ ୯ ତାରିଖରେ ହତ୍ୟା କରିଥିବା ଅଭିଯୋଗ ହୋଇଥିଲା । ଗତ ମେ ୧୬ ତାରିଖରେ ସେ ଜେଲରେ ଭର୍ତି ହୋଇଥିଲେ ।
ସକାଳେ ନିତ୍ୟକର୍ମ ଶେଷ ପରେ ଜଳଖିଆ ଖାଇବା ପାଇଁ ସବିତା ନିଜ କୋଠରୀରୁ ବାହାରକୁ ଆସିଥିଲେ । ସେ ଜେଲ ମଧ୍ୟରେ ଏଣେତେଣେ ବୁଲୁଥିବା ଦେଖା ଯାଇଥିଲା । ମାତ୍ର କିଛି ସମୟ ପରେ ଆଉ ତାଙ୍କର ପତ୍ତା ମିଳି ନ ଥିଲା । ପରେ ଜେଲ ପରିସରରେ ଥିବା ଏକ ଗଛରେ ତାଙ୍କର ମୃତ ଦେହ ଝୁଲୁଥିବା ଦେଖା ଯାଇଥିଲା । ସବିତାଙ୍କ ମୃତ୍ୟୁ ଖବର ସମ୍ପର୍କରେ ଜେଲ କର୍ତ୍ତୃପକ୍ଷ ପୁଲିସକୁ ଅବଗତ କରିଛନ୍ତି । ବଡ଼ବିଲର ଜଣେ ପ୍ରଥମଶ୍ରେଣୀ ବିଚାରପତି ଘଟଣାସ୍ଥଳରେ ପହଞ୍ଚି ଘଟଣାର ଅନୁଧ୍ୟାନ କରିଛନ୍ତି । ସମ୍ପୃକ୍ତ ମହିଳା ଆତ୍ମହତ୍ୟା କରିଛନ୍ତି ବୋଲି ଜେଲ କର୍ମଚାରୀମାନେ କହୁଥିବାବେଳେ ସ୍ବାଭାବିକ ଭାବରେ ଏହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ଜେଲର କଡ଼ା ସୁରକ୍ଷା ମଧ୍ୟରେ ଥାଇ ଜଣେ ମହିଳା କଏଦୀ ଆତ୍ମହତ୍ୟା କରିବା ଘଟଣା ଜେଲ ଭିତରର ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠିଛି । ସେ ସତରେ ଆତ୍ମହତ୍ୟା କରିଛନ୍ତି ନା ତାଙ୍କ ମୃତ୍ୟୁ ପଛରେ ଆଉ କିଛି ରହସ୍ୟ ଅଛି ତାହା ମଧ୍ୟ ସନ୍ଦେହ ଘେରରେ । ଏ ସମ୍ପର୍କରେ ବଡ଼ବିଲ୍ ସବଜେଲ କର୍ତ୍ତୃପକ୍ଷଙ୍କ ସହ ଯୋଗାଯୋଗ ପାଇଁ ଉଦ୍ୟମ ହୋଇଥିଲେ ହେଁ ତାହା ସମ୍ଭବ ହୋଇନାହିଁ ।
