ଛେଣ୍ଡିପଦା : ଛେଣ୍ଡିପଦା ଗସ୍ତରେ କେନ୍ଦ୍ର ଶିକ୍ଷା ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦିନିକିଆ ଗସ୍ତରେ ଆସି ସ୍ଥାନୀୟ ଅଞ୍ଚଳର ଜନସାଧାରଣଙ୍କ ବିଭିନ୍ନ ଅଭିଯୋଗକୁ ଗ୍ରହଣ କରି ଆଲୋଚନା କରିଥିଲେ।
ମନ୍ତ୍ରୀ ଶ୍ରୀ ପ୍ରଧାନ ଅପରାହ୍ନରେ ବାଗଡ଼ିଆ ଠାରେ ରାଜ୍ୟସ୍ତରୀୟ କ୍ରିକେଟ ଖେଳର ଉଦଯାପନୀ ଉତ୍ସବରେ ଯୋଗଦାନ କରିବାର କାର୍ଯ୍ୟକ୍ରମ ଥିଲେ ହେଁ ପୂର୍ବାହ୍ନରେ ମନ୍ତ୍ରୀ ଶ୍ରୀ ପ୍ରଧାନ ଛେଣ୍ଡିପଦା ବିଜେପି କାର୍ଯ୍ୟାଳୟରେ ପହଁଞ୍ଚି ପ୍ରଥମେ ଛେଣ୍ଡିପଦା ବ୍ଳକର କର୍ମଜୀବୀ ସାମ୍ବାଦିକ ସଂଘର ପ୍ରତିନିଧିଙ୍କ ସହ ଆଲୋଚନା କାଳରେ ସମ୍ବଲପୁର ବା ଢ଼େଙ୍କାନାଳ ସଂସଦୀୟ କ୍ଷେତ୍ରରୁ ନିର୍ବାଚନ ଲଢ଼ିବା ପାଇଁ ଦଳକୁ ଅବଗତ କରିଥିବା ସୂଚନା ଦେଇଥିଲେ। ତେବେ ଦଳ ଯାହା ନିଷ୍ପତ୍ତି ନେବ, ସେ ତାହା ମାନିବେ ବୋଲି ଦର୍ଶାଇଥିଲେ। ଏପରିକି ରାଜ୍ୟସ୍ତରୀୟ କ୍ରିକେଟ ସଭାରେ ସମ୍ବଲପୁର ସଂସଦୀୟ କ୍ଷେତ୍ରରେ ନିର୍ବାଚନ ଲଢ଼ିବା ସମ୍ଭାବନା ରହିଛି ବୋଲି ସେଠାରେ ପ୍ରକାଶ କରିଥିଲେ। ଯାହାକୁ ନେଇ ଦଳୀୟ କର୍ମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ପରେ ଛେଣ୍ଡିପଦା ଉଚ୍ଚବିଦ୍ୟାଳୟରେ ଚଳିତ ମାସରେ ହେବାକୁ ଥିବା ପ୍ଲାଟିନମ ଜୁବୁଲି କମିଟିର କର୍ମକର୍ତ୍ତାଙ୍କ ସହ ଆଲୋଚନା କରିଥିଲେ। ଏଥିରେ ରାଜ୍ୟପାଳଙ୍କ ଯୋଗଦାନ ପାଇଁ ଚେଷ୍ଟା କରାଯିବ ବୋଲି ମନ୍ତ୍ରୀ ଶ୍ରୀ ପ୍ରଧାନ କହିଥିଲେ। ଜୁବୁଲି କମିଟିର ସଭାପତି ଅଶୋକ କୁମାର ପ୍ରଧାନଙ୍କ ନେତୃତ୍ୱରେ ସମ୍ପାଦକ ରାଜକିଶୋର ସାହୁ,ଗଣେଶ୍ୱର ପ୍ରଧାନ,ପ୍ରମୋଦ କୁମାର ଦେହୁରୀ, ଦଣ୍ଡଧର ଦେହୁରୀ,କୋଷାଧ୍ୟକ୍ଷ ଗୋବିନ୍ଦ ପ୍ରଧାନଙ୍କ ସମେତ ରବୀନ୍ଦ୍ର ସେଠୀ,ସତ୍ୟବାଦୀ ପ୍ରଧାନ ପ୍ରମୁଖ ମନ୍ତ୍ରୀ ଶ୍ରୀ ପ୍ରଧାନଙ୍କ ସହ ଆଲୋଚନା କରିଥିଲେ।
