ସମାଜ ଡିଜିଟାଲ ଡେସ୍କ: ୨୬/୧୧ ମୁମ୍ବଇ ଆକ୍ରମଣର ଅନ୍ୟତମ ମାଷ୍ଟରମାଇଣ୍ଡ ତାହାଓ୍ବର ହୁସେନ ରାଣାକୁ ଆମେରିକା ଭାରତକୁ ପ୍ରତ୍ୟର୍ପଣ କରିବା ପରେ ତା’କୁ ଜାତୀୟ ତଦନ୍ତକାରୀ ସଂସ୍ଥା(ଏନଆଇଏ) ଗିରଫ କରିଛି। ୨୦୦୮ରେ ଘଟିଥିବା ଏହି ଆକ୍ରମଣରେ ୧୬୬ ଜଣଙ୍କ ଜୀବନ ଯାଇଥିଲା। ଘଟଣାର ୫ ଦିନ ପୂର୍ବରୁ ରାଣା ଭାରତ ଆସି ଆକ୍ରମଣର ଯୋଜନା ପ୍ରସ୍ତୁତ କରିଥିଲା। ଆକ୍ରମଣ ପରେ ରାଣା ଘଟଣାର ଅନ୍ୟତମ ମାଷ୍ଟରମାଇଣ୍ଡ ଡେଭିଡ କୋଲମ୍ୟାନ ହେଡ୍ଲିକୁ ଫୋନ କରିଥିଲା। ଆକ୍ରମଣ ପୂର୍ବରୁ ଏବଂ ପରେ ହେଡଲି ସହିତ ରାଣା ବହୁବାର ଯୋଗାଯୋଗରେ ଥିଲା। ଉଭୟେ ପିଲାଦିନର ସାଙ୍ଗ ଥିଲେ। ଆକ୍ରମଣ ପରେ ରାଣା ଫୋନ କରି ହେଡଲିକୁ ଭାରତ ବିରୋଧରେ ଯାହା କହିଥିଲା ତାହା ଏବେ ସାମ୍ନାକୁ ଆସିଛି।
ଆମେରିକା ନ୍ୟାୟ ବିଭାଗ ଦ୍ଵାରା ଜାରି ଏକ ବିବୃତି ଅନୁସାରେ, ହେଡଲିକୁ ଫୋନ କରି ରାଣା କହିଥିଲା ‘ଇଣ୍ଡିଆନ୍ସ ଡିଜର୍ଭଡ୍ ଇଟ୍’। ଅର୍ଥାତ ଏପରି ବର୍ବର ଆକ୍ରମଣ ପାଇଁ ଭାରତୀୟମାନେ ଯୋଗ୍ୟ। ସେମାନଙ୍କୁ ଏହିପରି ଆକ୍ରମଣ ଦରକାର। ଏହା ସହିତ ଆକ୍ରମଣରେ ନିହତ ହୋଇଥିବା ୯ ଲଶ୍କର ଆତଙ୍କବାଦୀଙ୍କୁ ରାଣା ପ୍ରଶଂସା ବି କରିଥିଲା। ସେମାନଙ୍କୁ ପାକିସ୍ତାନର ସର୍ବୋଚ୍ଚ ସାମରିକ ସମ୍ମାନ ‘ନିଶାନ ଇ ହାଇଦର’ରେ ସମ୍ମାନିତ କରାଯିବା ଉଚିତ ବୋଲି ରାଣା କହିଥିଲା।
