କଲକାତା : ପଶ୍ଚିମବଙ୍ଗର ୨୮ହଜାର ଦୁର୍ଗାପୂଜା କମିଟିକୁ ୧୦ହଜାର ଟଙ୍କା ଲେଖାଏଁ ଅନୁଦାନ ପ୍ରଦାନ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ନିଷ୍ପତ୍ତିର କାର୍ଯ୍ୟକାରିତା ଉପରେ ହାଇକୋର୍ଟ ମଧ୍ୟବର୍ତ୍ତୀକାଳୀନ ରହିତାଦେଶ ଲାଗୁ କରିଛନ୍ତି। ମମତାଙ୍କ ଏହି ନିଷ୍ପତ୍ତିକୁ ଚାଲେଞ୍ଜ କରି ଓକିଲ ଦ୍ୟୁତିମାନ ଚାଟାର୍ଜି ଓ ସୌରଫ ଗୁପ୍ତା ଦାୟର କରିଥିବା ଜନସ୍ୱାର୍ଥ ମାମଲାର ଶୁଣାଣି କରି ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଶୁକ୍ରବାର ଏହି ରହିତାଦେଶ ଜାରି କରିଛନ୍ତି। ଅକ୍ଟୋବର ୯ ପର୍ଯ୍ୟନ୍ତ ଏହି ରହିତାଦେଶ ଜାରି କରାଯାଇଛି। ସେପ୍ଟେମ୍ବର ୧୦ରେ ମମତା ପୂଜା କମିଟିକୁ ଅନୁଦାନ ପ୍ରଦାନ ନେଇ ଘୋଷଣା କରିଥିଲେ। ଏଥିପାଇଁ ରାଜକୋଷରୁ ୨୮କୋଟି ଟଙ୍କା ଖର୍ଚ୍ଚ ହେବ। ଅନୁଦାନ ପାଇବାକୁ ଥିବା ପୂଜାକମିଟି ମଧ୍ୟରୁ କଲକାତାର ୩୦୦୦ ପୂଜା କମିଟି ରହିଛି। ମମତା ଦଳର ଭୋଟ ବ୍ୟାଙ୍କ ବୃଦ୍ଧି ପାଇଁ ଏପରି ଅନୁନାଦ ଘୋଷଣା କରିଥିବା ବିଜେପି ଅଭିଯୋଗ କରିଥିଲା।
