ଉପକୂଳରେ ଅସହ୍ୟ ଗୁଳୁଗୁଳି: ସପ୍ତାହେ ଯାଏ କାଳବୈଶାଖୀ

ଭୁବନେଶ୍ବର : ଖରା କମିଥିଲେ ବି ବାୟୁମଣ୍ଡଳରେ ଆର୍ଦ୍ରତା ଅଧିକ ଯୋଗୁଁ ଉପକୂଳବର୍ତ୍ତୀ ଜିଲାଗୁଡ଼ିକରେ ପ୍ରବଳ ଗୁଳୁଗୁଳି ଅନୁଭୂତ ହେଉଛି। ଅପରାହ୍ଣରେ କାଳବୈଶାଖୀ ପ୍ରଭାବରେ ବିଭିନ୍ନ ଅଞ୍ଚଳରେ ବିଜୁଳି ଘଡ଼ଘଡ଼ି ସହିତ ବର୍ଷା ଏବଂ ପବନ ହେଉଛି । ରବିବାର ସକାଳ ସାଢ଼େ ୮ଟାରେ ଭୁବନେଶ୍ବରରେ ସର୍ବାଧିକ ତାପମାତ୍ରା ୩୨.୬ଡିଗ୍ରୀ ଥିବାବେଳେ ବାୟୁମଣ୍ଡଳର ଆର୍ଦ୍ରତା ପରିମାଣ ୬୯% ଥିଲା। ଅନୁରୂପ ଭାବେ ଏହି ସମୟରେ କଟକରେ ଦିନ ତାପମାତ୍ରା ୩୧.୬ ଡିଗ୍ରୀ ଥିବାବେଳେ ବାୟୁମଣ୍ଡଳ ଆର୍ଦ୍ରତା ୭୫% ଥିଲା। ପୁରୀରେ ଦିନ ତାପମାତ୍ରା ୩୨ଡିଗ୍ରୀ ରେକର୍ଡ ହୋଇଥିବା ବେଳେ ଆର୍ଦ୍ରତା ୭୯% ରହିଥିଲା। ଫଳସ୍ବରୂପ ଭୁବନେଶ୍ବର, କଟକ ଏବଂ ପୁରୀ ସମେତ ଉପକୂଳବର୍ତ୍ତୀ ଜିଲାଗୁଡ଼ିକରେ ପ୍ରବଳ ଗରମ ଓ ଗୁଳୁଗୁଳି ଲାଗି ରହିଥିଲା।
ରାଜ୍ୟର ସର୍ବାଧିକ ତାପମାତ୍ରା ସମ୍ବଲପୁରରେ ୪୦.୬ଡିଗ୍ରୀ ଥିବାବେଳେ ବୌଦ୍ଧ ୩୯.୮, ଟିଟିଲାଗଡ଼ ଓ ଭବାନୀପାଟଣାରେ ୩୯.୫, ହୀରାକୁଦ ୩୯.୧, ଝାରସୁଗୁଡ଼ା ଓ ମାଲକାନଗିରିରେ ୩୮.୮, ଅନୁଗୋଳ ୩୮.୭, ବରଗଡ଼ ୩୮.୬ ଏବଂ ଖୋର୍ଦ୍ଧା ଓ ଭୁବନେଶ୍ବରରେ ୩୮ଡିଗ୍ରୀ ଥିବା ରେକର୍ଡ କରାଯାଇଛି ା
ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ, ଆସନ୍ତା ସପ୍ତାହେ ପର୍ଯ୍ୟନ୍ତ ବିଭିନ୍ନ ଅଞ୍ଚଳରେ କାଳବୈଶାଖୀ ସମ୍ଭାବନା ରହିଛି। ଆଗାମୀ ୨୪ଘଣ୍ଟା ମଧ୍ୟରେ ଦକ୍ଷିଣ, ଉତ୍ତର ଉପକୂଳ ଓଡ଼ିଶାର ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼ ଏବଂ ଝାରସୁଗୁଡ଼ା ଜିଲାର କିଛି ଅଞ୍ଚଳରେ କାଳବୈଶାଖୀ ପ୍ରଭାବରେ ବିଜୁଳି ଘଡ଼ଘଡ଼ି ସହ ଝଡ଼ବର୍ଷା ହୋଇପାରେ। ସୁନ୍ଦରଗଡ଼, ଝାରସୁଗୁଡ଼ା, କେନ୍ଦୁଝର, ମୟୂରଭଞ୍ଜ, ବାଲେଶ୍ବର, କୋରାପୁଟ, ମାଲକାନଗିରି, ନବରଙ୍ଗପୁର, ରାୟଗଡ଼ା, ଗଜପତି, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ବଲାଙ୍ଗିର ଏବଂ ନୂଆପଡ଼ା ଜିଲାକୁ କାଳବୈଶାଖୀ ପାଇଁ ସତର୍କ ସୂଚନା ଜାରି କରାଯାଇଛି। ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ ଏବଂ ଗଜପତି ଜିଲାକୁ ଗରମ ଓ ଗୁଳୁଗୁଳି ପାଇଁ ପାଣିପାଗ ବିଭାଗ ପକ୍ଷରୁ ୟେଲୋ ୱାର୍ଣ୍ଣିଂ ଜାରି ହୋଇଛି।