ଲକ୍ଷ୍ନୌ: ଚଳିତ ଆଇସିସି ଦିନିକିଆ ବିଶ୍ବକପରେ ଆଫଗାନିସ୍ତାନ ଚତୁର୍ଥ ବିଜୟ ହାସଲ କରିଛି। ଶୁକ୍ରବାର ଲକ୍ଷ୍ନୌର ଏକ୍ନା ଷ୍ଟାଡ଼ିୟମରେ ଖେଳାଯାଇଥିବା ମ୍ୟାଚରେ ଆଫଗାନିସ୍ତାନ ବୋଲିଂ ଓ ବ୍ୟାଟିଂରେ ଚମତ୍କାର ପ୍ରଦର୍ଶନ କରି ନେଦରଲ୍ୟାଣ୍ଡ୍ସକୁ ୭ ୱିକେଟରେ ପରାସ୍ତ କରିଛି। ଏହି ବିଜୟ ସହ ଆଫଗାନିସ୍ତାନ ସେମିଫାଇନାଲ ଆଶା ଉଜ୍ଜୀବିତ ହୋଇଛି। ଆଫଗାନିସ୍ତାନର ୭ଟି ମ୍ୟାଚରୁ ୪ର୍ଥ ବିଜୟ ଓ ୩ଟି ପରାଜୟ ସହ ୮ ପଏଣ୍ଟ ପାଇଥିବା ବେଳେ ନେଦରଲ୍ୟାଣ୍ଡ୍ସ ସମାନ ସଂଖ୍ୟକ ମ୍ୟାଚରୁ ପଞ୍ଚମ ପରାଜୟ ସହ ସେମି ଫାଇନାଲ ଦୌଡ଼ରୁ ବାଦ୍ ପଡିଛି।
ନେଦରଲ୍ୟାଣ୍ଡ୍ସ ଇଙ୍ଗେଲବିଚ୍ଙ୍କ ୫୮ରନ ବଳରେ ୧୭୯ରନ କରିଥିଲା। ଜବାବରେ ଆଫଗାନିସ୍ତାନ ରେହମତ ସାହ ୫୨ ଓ ରେହମତ୍ଉଲ୍ଲା ସାହିଦିଙ୍କ ଅପରାଜିତ ୫୬ରନ ବଳରେ ୩ ୱିକେଟ ହରାଇ ୧୧୧ଟି ବଲ ବାକି ଥାଇ ୧୮୧ରନ କରି ବିଜୟ ହାସଲ କରିନେଇଥିଲା। ୧୮୦ରନର ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ଆଫଗାନିସ୍ତାନର ଦୁଇ ଓପନର ରେହମାନଉଲ୍ଲା ଗୁର୍ବାଜ୍ ଓ ଇବ୍ରାହିମ ଜର୍ଡାନ ୨୭ରନ ସଂଗ୍ରହ କରିଥିଲେ।ଗୁର୍ବାଜ୍ ୧୦ରନ କରି ଆଉଟ୍ ହୋଇଥିଲେ। ଦ୍ବିତୀୟ ୱିକେଟରେ ଜର୍ଡାନ ଓ ରେହମତ୍ ସାହ ୨୮ରନ ସଂଗ୍ରହ କରିବା ସହିତ ସ୍କୋରକୁ ୫୫ରନରେ ପହଞ୍ଚାଇଥିଲେ। ଜର୍ଡାନ ୨୦ରନ କରି ଆଉଟ୍ ହୋଇଥିଲେ। ୩ୟ ୱିକେଟ ପାଇଁ ରେହମତ୍ ଓ ହାସମତୁଲ୍ଲା ସାହିଦି ୭୪ରନ ସଂଗ୍ରହ କରିଥିଲେ। ସ୍କୋର ୧୨୯ରନ ଥିବାବେଳେ ରେହମତ୍ ୫୨ରନ କରି ଆଉଟ୍ ହୋଇଥିଲେ। ୪ର୍ଥ ୱିକେଟରେ ସାହିଦି ଓ ଆଜ୍ମାତୁଲ୍ଲା ଉମାରଜାଇ ଅବିଭାଜିତ ୫୨ରନ ସଂଗ୍ରହ କରି ଦଳକୁ ବିଜୟୀ କରାଇଥିଲେ। ସାହିଦି ୫୬ ଓ ଓମାରଜାଇ ୩୧ରନ କରି ଅପରାଜିତ ରହିଥିଲେ। ନେଦରଲ୍ୟାଣ୍ଡ୍ସ ପକ୍ଷରୁ ଲୋଗାନ ଭାନ ବ୍ରିକ୍, ସାକିବ୍ ଜୁଲଫିକର ଗୋଟିଏ ଲେଖାଏଁ ୱିକେଟ ନେଇଥିଲେ।ମହମ୍ମଦ ନବି ପ୍ଲେୟାର ଅଫ ଦି ମ୍ୟାଚ ବିବେଚିତ ହୋଇଥିଲେ।
