ସମାଜ ଡିଜିଟାଲ ଡେସ୍କ: କୌଣସି ଗର୍ତ୍ତ ହେଉ କି ବିପଦପୂର୍ଣ୍ଣ ସ୍ଥାନ, ଯଦି କେହି ସେଠାରେ ଫଶିଯାଆନ୍ତି, ତେବେ ମଣିଷ ସେମାନଙ୍କୁ ଉଦ୍ଧାର କରିଥାଏ। ବିଭିନ୍ନ ସମୟରେ ଭିନ୍ନ ଭିନ୍ନ ଅବସ୍ଥାରେ ଉଦ୍ଧାରକାର୍ଯ୍ୟ ହୋଇଥାଏ। କେଉଁଠି ଜୀବଜନ୍ତୁଙ୍କୁ ତ ଆଉ କେଉଁଠି ମଣିଷକୁ ଉଦ୍ଧାରକାରୀ ଦଳ ଉଦ୍ଧାର କରିଥାଆନ୍ତି। କିନ୍ତୁ ସାମାଜିକ ଗଣମାଧ୍ୟମରେ ପ୍ରଘଟ ହେଉଥିବା ଏକ ଭିଡିଓ ଏବେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି।
ଭିଡିଓଟି ବି ସେପରି ଶିକ୍ଷଣୀୟ ହୋଇଛି। କାରଣ ଏକ ପରିତ୍ୟକ୍ତ କୂଅ ଭିତରେ ପଡ଼ିଯାଇଥିବା ବିଲେଇ ଛୁଆକୁ ଉଦ୍ଧାର କରାଯାଉଛି। ଆଉ ଉଦ୍ଧାର କାର୍ଯ୍ୟରେ ଲାଗିଛି ଏକ ମାଙ୍କଡ଼ ଛୁଆ। କଳେବଳେ କୌଶଳେ ମାଙ୍କଡ଼ ଛୁଆଟି ବିଲେଇଟିକୁ ସେଠାରେ ବାହାର କରିବାରେ ସଫଳ ହୋଇଛି।
ଭିଡିଓଟି କେଉଁ ଅଞ୍ଚଳର ତାହା ଜଣାପଡ଼ିନାହିଁ। କିନ୍ତୁ ସାମାଜିକ ଗଣମାଧ୍ୟମ ଏକ୍ସ’ରେ ଏହା ଦେଖିବାକୁ ମିଳିଛି। ଏକ ବିଲେଇ ଛୁଆ କୌଣସି ପ୍ରକାରେ ଗୋଟିଏ କୂଅରେ ପଡ଼ି ଯାଇଛି। ବିଲେଇଟି କୂଅରୁ ବାହାରିପାରୁ ନ ଥିବାବେଳେ ଏହାକୁ ଦେଖିଛି ଏକ ମାଙ୍କଡ଼ ଛୁଆ। ଛୁଆ ମାଙ୍କଡ଼ଟି କୂଅ ଭିତରକୁ ପଶିଯାଇ ବିଲେଇକୁ ହାତରେ ଉଠାଇ ବାହାରକୁ ପକାଇବାକୁ ଚେଷ୍ଟା କରୁଛି। କିନ୍ତୁ ପାରୁ ନାହିଁ। ଛୁଆ ମାଙ୍କଡ଼ଟି ପୁଣି ବାହାରକୁ ଆସିଯାଉଛି।
Rescue operation of the century pic.twitter.com/XSTxUOdEZC
— Nature is Amazing ☘️ (@AMAZlNGNATURE) August 10, 2024
କିଛି ସମୟ ପରେ କୂଅ ଭିତରକୁ ଯାଇ ପୁନର୍ବାର ଉଦ୍ୟମ କରୁଛି। ଏପରି ବାରମ୍ବାର ଉଦ୍ୟମ ପରେ ଆଉ ଏକ ଛୁଆ ମାଙ୍କଡ଼ ସେଠାରେ ପହଞ୍ଚୁଛି। ପ୍ରଥମରୁ ଥିବା ଛୁଆ ମାଙ୍କଡ଼ଟି ସେହି ମାଙ୍କଡ଼ର ସହାୟତା ଲୋଡୁଛି। କିନ୍ତୁ ୨ୟ ମାଙ୍କଡ଼ ସେଠାରୁ ପଳାଇଯାଉଛି। ଏହି ସମୟରେ ପ୍ରଥମ ମାଙ୍କଡ଼ ୨ୟ ମାଙ୍କଡ଼କୁ ବିଲେଇ ଛୁଆକୁ ଉଦ୍ଧାର କରିବାକୁ ଭିଡି ଧରୁଛି। ହେଲେ ୨ୟ ମାଙ୍କଡ଼ଟି ସେଠାରୁ ଚାଲିଯାଉଛି।
କିଛି ସମୟ ପରେ ନିକଟରେ ଏକ ଝିଅଟିଏକୁ ଦେଖି ମାଙ୍କଡ଼ ତା’ର ସହାୟତା ନେଉଛି। ଆଉ ସେହି ଝିଅଟି ପୋତି ହୋଇଯାଇଥିବା କୂଅରେ ପଶି ବିଲେଇ ଛୁଆକୁ ଉଦ୍ଧାର କରି ବାହାରଖୁ ଆଣିଛି। ଏହା ପରେ ମାଙ୍କଡ଼ ଛୁଆ ଏବଂ ଉକ୍ତ ଝିଅ ବିଲେଇ ଛୁଆର ଯତ୍ନ ନେଉଛନ୍ତି। ମାଙ୍କଡ଼ଟି ପାଇଁ ବିଲେଇ ଛୁଆର ଜୀବନ ବଞ୍ଚି ଯାଇଛି। ଭିଡିଓଟିର ଶୀର୍ଷକ (କ୍ୟାପସନ) ରହିଛି ‘ରେସକ୍ୟୁ ଅପରେସନ ଅଫ ଦ ସେଞ୍ଚୁରୀ’ ଅର୍ଥାତ ‘ଶତାବ୍ଦୀର ଉଦ୍ଧାର କାର୍ଯ୍ୟ’।
