ଅହମ୍ମଦାବାଦ: ଏଲିମିନେଟର ମ୍ୟାଚ୍ ପୂର୍ବରୁ ବିରାଟ କୋହଲିଙ୍କୁ ଅହମ୍ମଦାବାଦରେ ଧମକ ମିଳିଛି, ଯେଉଁଥିପାଇଁ ଆରସିବି ତା’ର ଏକମାତ୍ର ଅଭ୍ୟାସ ମ୍ୟାଚ୍ ବାତିଲ କରିଛି। ଏହା ବ୍ୟତୀତ ମ୍ୟାଚ୍ ପୂର୍ବରୁ କୌଣସି ସାମ୍ବାଦିକ ସମ୍ମିଳନୀ ମଧ୍ୟ ହୋଇନାହିଁ। ଏକ ରିପୋର୍ଟରେ ଏହା ପ୍ରକାଶ ପାଇଛି। ଆଇପିଏଲ ୨୦୨୪ର ଏଲିମିନେଟର ମୁକାବିଲା ରାଜସ୍ଥାନ ରୟାଲ୍ସ ଓ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମଧ୍ୟରେ ବୁଧବାର କେଳାଯିବ। ଏହି ମ୍ୟାଚରେ ଯେଉଁ ଦଳ ହାରିବ ସେ ବାହାରିଯିବ ଏବଂ ଅନ୍ୟ ଦଳ କ୍ୱାଲିଫାୟର-୨ରେ ସନରାଇଜର୍ସ ହାଇଦ୍ରାବାଦକୁ ଭେଟିବ।
ଏହି ମୁକାବିଲା ପୂର୍ବରୁ ଆନନ୍ଦବଜାର ପତ୍ରିକାର ରିପୋର୍ଟରେ ଏକ ବଡ଼ ତଥ୍ୟ ପ୍ରକାଶ ପାଇଛି। ରିପୋର୍ଟ ମୁତାବକ, ବିରାଟ କୋହଲିଙ୍କୁ ଧମକ ମିଳିଥିଲା, ଯେଉଁଥିପାଇଁ ଆରସିବି ଅଭ୍ୟାସ ମ୍ୟାଚ୍ ଏବଂ ସାମ୍ବାଦିକ ସମ୍ମିଳନୀକୁ ବାତିଲ କରିଦେଇଥିଲା। ସୂଚନା ଅନୁସାରେ, ଗୁଜରାଟ ପୁଲିସ ସୋମବାର ରାତିରେ ଅହମ୍ମଦାବାଦ ବିମାନବନ୍ଦରରୁ ୪ ଜଣ ସନ୍ଦିଗ୍ଧଙ୍କୁ ଗିରଫ କରିଥିଲା। ତେବେ ଏପର୍ଯ୍ୟନ୍ତ ଉଭୟ ଦଳ ପକ୍ଷରୁ ବିଧିବଦ୍ଧ ଭାବେ କୌଣସି ବୟାନ ଆସିନାହିଁ।
ଏହି ମାମଲାରେ ପୁଲିସ ଅଧିକାରୀ ବିଜୟ ସିଂହ ଜ୍ବାଲା କହିଛନ୍ତି, ‘‘ଅହମ୍ମଦାବାଦରେ ପହଞ୍ଚିବା ପରେ ବିରାଟ କୋହଲି ଗିରଫ ସନ୍ଦିଗ୍ଧଙ୍କ ବିଷୟରେ ଜାଣିବାକୁ ପାଇଲେ। ତାଙ୍କ ସୁରକ୍ଷା ଆମର ସର୍ବୋଚ୍ଚ ପ୍ରାଥମିକତା। ଆରସିବି କୌଣସି ବିପଦର ସମ୍ମୁଖୀନ ହେବାକୁ ଚାହୁଁନଥିଲା। କୌଣସି ଅଭ୍ୟାସ ମ୍ୟାଚ୍ ହେବ ନାହିଁ ବୋଲି ସେମାନେ ଆମକୁ ସୂଚନା ଦେଇଛନ୍ତି। ରାଜସ୍ଥାନ ରୟାଲ୍ସକୁ ମଧ୍ୟ ଏ ବିଷୟରେ ଅବଗତ କରାଯାଇଥିଲା, କିନ୍ତୁ ସେମାନଙ୍କୁ ତାଙ୍କ ଅଭ୍ୟାସ ଆଗକୁ ବଢାଇବାରେ କୌଣସି ଅସୁବିଧା ନଥିଲା।’’
Comments are closed.