ଦିଲ୍ଲୀ ଆପଣାଇବ ଓଡ଼ିଶା ମଡେଲ

ଭୁବନେଶ୍ବର : ବିଧାୟକମାନେ ବିଧାନସଭାରେ କାଗଜ ବ୍ୟବହାର କରିବା ପରିବର୍ତ୍ତେ ଟାବଲେଟ୍‌ ବ୍ୟବହାର କରିବାକୁ ବ୍ୟବସ୍ଥା ହୋଇଛି। ଓଡ଼ିଶା ବିଧାନସଭାର କାଗଜବିହୀନ ପ୍ରକ୍ରିୟା ଅନୁଧ୍ୟାନ କରିବା ପାଇଁ ଦିଲ୍ଲୀ ବାଚସ୍ପତି ବିଜେନ୍ଦର ଗୁପ୍ତା ତିନି ଦିନିଆ ଭୁବନେଶ୍ୱର ଗସ୍ତରେ ଆସୁଛନ୍ତି। ଜାତୀୟ ଇ-ବିଧାନ ଆବେଦନ (ନେଭା) ମାଧ୍ୟମରେ କାଗଜବିହୀନ ଏବଂ ଡିଜିଟାଲ୍ ବ୍ୟବସ୍ଥା ପ୍ରଚଳନ କରିଥିବା ରାଜ୍ୟଗୁଡ଼ିକ ମଧ୍ୟରେ ଓଡ଼ିଶା ବିଧାନସଭା ଅନ୍ୟତମ। ତେଣୁ ଓଡ଼ିଶାରୁ ଏହି ପ୍ରକ୍ରିୟା ବିଷୟରେ ଦିଲ୍ଲୀ ଜାଣିବାକୁ ଚାହୁଁଛି। ଦିଲ୍ଲୀ ବାଚସ୍ପତି ଶ୍ରୀ ଗୁପ୍ତା, ଉପବାଚସ୍ପତି ମୋହନ ସିଂହ ବିଷ୍ଟ, ବିଧାନସଭାର ଅଧିକାରୀ ଏବଂ ନେଭା ସହିତ ଜଡିତ ଅଧିକାରୀଙ୍କ ଏକ ପ୍ରତିନିଧି ଦଳ ଏପ୍ରିଲ ୧୫ରୁ ୧୭ ପର୍ଯ୍ୟନ୍ତ ଓଡ଼ିଆ ଆସୁଛନ୍ତି। ଓଡ଼ିଶା ବିଧାନସଭାରେ ନେଭାକୁ ପ୍ରଭାବଶାଳୀ ଭାବରେ କିପରି କାର୍ଯ୍ୟକାରୀ କରାଯାଉଛି, ସେ ସଂକ୍ରାନ୍ତୀୟ ପ୍ରଯୁକ୍ତିବିଦ୍ୟା ଏବଂ ମଡେଲଗୁଡ଼ିକ ବିଷୟରେ ସେମାନେ ଅନୁଧ୍ୟାନ କରିବେ। ଦିଲ୍ଲୀ ବିଧାନସଭା ୧୦୦ଦିନ ମଧ୍ୟରେ କାଗଜବିହୀନ କରାଯିବ ବୋଲି ଶ୍ରୀ ଗୁପ୍ତା ବଜେଟ ଅଧିବେଶନରେ ଘୋଷଣା କରିଥିଲେ। ଏପ୍ରିଲ୍ ୧୫ରେ ଦିଲ୍ଲୀ ବାଚସ୍ପତି ଶ୍ରୀ ଗୁପ୍ତା ଭୁବନେଶ୍ବରରେ ପହଞ୍ଚିବା ପରେ ରାଜ୍ୟପାଳ ହରିବାବୁ କମ୍ଭମପାଟି ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ସୌଜନ୍ୟମୂଳକ ସାକ୍ଷାତ କରିବେ। ଏପ୍ରିଲ ୧୬ରେ ଦିଲ୍ଲୀ ବାଚସ୍ପତି ଏବଂ ତାଙ୍କ ପ୍ରତିନିଧି ଦଳ ଓଡ଼ିଶା ବିଧାନସଭା ବାଚସ୍ପତି ସୁରମା ପାଢୀଙ୍କୁ ଭେଟିବେ। ଓଡ଼ିଶା ବିଧାନସଭା ନେଭା କାର୍ଯ୍ୟାନ୍ୱୟନରେ ସାମିଲ ଥିବା ଅଂଶୀଦାର ଓ ଦିଲ୍ଲୀ ବାଚସ୍ପତିଙ୍କ ପ୍ରତିନିଧିଙ୍କ ମଧ୍ୟରେ ୧୭ରେ ଏକ ବୈଠକ ଅନୁଷ୍ଠିତ ହେବ। ଓଡ଼ିଶା ପରି ଦିଲ୍ଲୀ ବିଧାନସଭା ନେଭାର ଦ୍ରୁତ କାର୍ଯ୍ୟାନ୍ୱୟନ କରିବା ଦ୍ବାରା ବିଧାନସଭାର କାର୍ଯ୍ୟକାରିତା ଅଧିକ ସ୍ୱଚ୍ଛ, ପ୍ରଯୁକ୍ତି-ସକ୍ଷମ ଏବଂ ନାଗରିକ-କୈନ୍ଦ୍ରିକ ଆଭିମୁଖ୍ୟ ଗ୍ରହଣ କରିବ। ନେଭା ବିଧାନସଭା ସଦସ୍ୟଙ୍କୁ ବିଲ୍, ନୋଟିସ୍, ପ୍ରଶ୍ନ ଏବଂ କମିଟି ରିପୋର୍ଟ ଭଳି ସୂଚନା ସେମାନଙ୍କ ଡିଭାଇସରେ ସିଧାସଳଖ ଆକ୍ସେସ୍ କରିବାକୁ ସକ୍ଷମ କରିଥାଏ, ଯାହା ଫଳରେ କାଗଜପତ୍ରର ଆବଶ୍ୟକତା ଦୂର ହୋଇଥାଏ।