ଆଶ୍ୱସ୍ତି ଖବର: ଅଗଷ୍ଟ ସୁଦ୍ଧା କୋଭିଡ ଟିକା ଉତ୍ପାଦନ ବୃଦ୍ଧି କରିବେ ସେରମ ଇନଷ୍ଟିଚ୍ୟୁଟ ଓ ଭାରତ ବାୟୋଟେକ

ନୂଆଦିଲ୍ଲୀ: ଦେଶର ଅଧିକାଂଶ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ କୋଭିଡ-ଟିକାର ଘୋର ଅଭାବ ପରିଲକ୍ଷି ହେଉଥିବା ଏବଂ ଟିକାପାଇଁ ଲମ୍ବାଧାଡି ଲାଗୁଥିବାବେଳେ ପରିସ୍ଥିତିର ସମାଧାନ କରିବାକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଇତିମଧ୍ୟରେ ଦେଶର ଦୁଇ ପ୍ରମୁଖ ଟିକା ଉତ୍ପାଦନକାରୀ କମ୍ପାନୀ ଭାରତ ବାୟୋଟେକ ଏବଂ ସେରମ୍‍ ଇନଷ୍ଟିଚ୍ୟୁଟ ସହିତ କଥାବାର୍ତ୍ତା କରିଥିବା ଜଣାଇଛି। ଏହି ଦୁଇ କମ୍ପାନୀ ଆଗାମୀ ଚାରିମାସ ପାଇଁ ସେମାନଙ୍କର ଟିକା ଉତ୍ପାଦନ ଯୋଜନା କେନ୍ଦ୍ର ସରକାରଙ୍କ ନିକଟରେ ଦାଖଲ କରିଛନ୍ତି। ସେମାନେ କହିଛନ୍ତି ଯେ ଅଗଷ୍ଟ ସୁଦ୍ଧା ଟିକା ଉତ୍ପାଦନ ସଂଖ୍ୟା ଯଥାକ୍ରମେ ୭.୮ କୋଟି ଏବଂ ୧୦ କୋଟିକୁ ବୃଦ୍ଧି କରିପାରିବେ। ହାଇଦରାବାଦସ୍ଥିତ ଭାରତ ବାୟୋଟେକ ପକ୍ଷରୁ ସ୍ୱଦେଶୀ ସ୍ତରରେ ବିକଶିତ କୋଭାକ୍ସନ ଏବଂ ଅକ୍ସଫୋର୍ଡ-ଆଷ୍ଟ୍ରଜେନେକାର ପୁଣେସ୍ଥିତ ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆର ତିଆରି ହେଉଥିବା କୋଭିସିଲ୍ଡ ଟିକା ସଂପ୍ରତି ଦେଶରେ କରୋନା ଭୂତାଣୁ ବିରୁଦ୍ଧରେ ବ୍ୟବହାର କରାଯାଉଛି।