ନୂଆଦିଲ୍ଲୀ : ଆସନ ଭାଗବଣ୍ଟାକୁ ନେଇ ଅସନ୍ତୁଷ୍ଟ କେନ୍ଦ୍ର ମନ୍ତ୍ରୀ ତଥା ରାଷ୍ଟ୍ରୀୟ ଲୋକ ସମତା ପାର୍ଟି (ଆରଏଲଏସ୍ପି) ଅଧ୍ୟକ୍ଷ ଉପେନ୍ଦ୍ର କୁଶୱାହା ଦିଲ୍ଲୀରେ ସୋମବାର ଲୋକତାନ୍ତ୍ରିକ ଜନତା ଦଳ ନେତା ଶରଦ ଯାଦବଙ୍କୁ ଭେଟିଛନ୍ତି। ଫଳରେ କୁଶୱାହା ବିଜେପି ନେତୃତ୍ୱାଧୀନ ଏନ୍ଡିଏ ଛାଡ଼ି କଂଗ୍ରେସ ନେତୃତ୍ୱାଧୀନ ବିରୋଧୀ ମେଣ୍ଟରେ ଯୋଗଦେବାକୁ ପ୍ରୟାସ ଆରମ୍ଭ କରିଥିବା ଚର୍ଚ୍ଚା ହେଉଛି। ଲୋକସଭା ନିର୍ବାଚନ ଲଢିବା ପାଇଁ ମାତ୍ର ୨ଟି ଆସନ ମିଳିବାରୁ କୁଶୱାହା ଅସନ୍ତୋଷ ବ୍ୟକ୍ତ କରିଥିଲେ। ଏବେ ସେ ଜେଡିୟୁ ଏବଂ ବିଜେପି ସହ ମିଶି ନିର୍ବାଚନ ଲଢିବାକୁ ଚାହୁଁନଥିବା ସଂକେତ ଦେଇଛନ୍ତି। ଶରଦଙ୍କ ସହ ସାକ୍ଷାତକାର ପରେ କୁଶୱାହା କହିଥିଲେ ଯେ ନୀତୀଶ କୁମାର ତାଙ୍କ ଦଳର ବିଧାୟକଙ୍କୁ ନିଜ ପଟକୁ ନେବା ପାଇଁ ପ୍ରଲୋଭିତ କରୁଛନ୍ତି। ସେ ଆରଏଲଏସ୍ପିକୁ ନଷ୍ଟ କରିବାକୁ ଚେଷ୍ଟା କରୁଛନ୍ତି। କିନ୍ତୁ ନୀତୀଶ ଏଥିରେ ସଫଳ ହେବେ ନାହିଁ।
ଅପରପକ୍ଷରେ କୁଶୱାହା ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କୁ ସାକ୍ଷାତକାର ପାଇଁ ସମୟ ମାଗିଛନ୍ତି ବୋଲି ଜାଣିବାକୁ ମିଳିଛି। ବିହାରରେ ଲୋକସଭା ଆସନ ଭାଗବଣ୍ଟାକୁ ନେଇ ସେ ଅମିତ ଶାହାଙ୍କ ସହ ଆଉଥରେ ଆଲୋଚନା କରିବେ ବୋଲି କୁହାଯାଉଛି। ହେଲେ ଏଭଳି ସମୟରେ କୁଶୱାହା ଓ ଶରଦଙ୍କ ସାକ୍ଷାତକାରକୁ ନେଇ ରାଜନୈତିକ ମହଲରେ ପ୍ରଶ୍ନ ଉଠିଛି। ବିରୋଧୀଙ୍କ ମହାମେଣ୍ଟରେ ମିଶିବା ପାଇଁ କୁଶୱାହା ପ୍ରୟାସ ଆରମ୍ଭ କରିଥିବା ଚର୍ଚ୍ଚା ହେଉଛି।
ଚର୍ଚ୍ଚାରେ ଶରଦ-କୁଶୱାହାଙ୍କ ସାକ୍ଷାତ ଆଲୋଚନା
Popular Categories
Previous article
Next article