ଲକ୍ଷ୍ନୌ: ଯୋଗ ଦିବସରେ ଉତ୍ତରପ୍ରଦେଶର ଜଣେ ମନ୍ତ୍ରୀ ସରକାରୀ ବାବୁଙ୍କ ହାତରେ ନିଜ ଜୋତାର ଫିତା ବନ୍ଧାଇ ବିବାଦକୁ ଆସିଛନ୍ତି। ଏହାର ଏକ ଭିଡିଓ ଭାଇରାଲ ହେବା ପରେ ମନ୍ତ୍ରୀଙ୍କୁ କଡ଼ା ସମାଲୋଚନାର ଶିକାର ହେବାକୁ ପଡ଼ିଛି।
ମନ୍ତ୍ରୀ ଜଣକ ହେଉଛନ୍ତି ଲକ୍ଷ୍ମୀନାରାୟଣ ୱାଡେଡ୍। ସେ ରାଜ୍ୟରେ ସଂଖ୍ୟାଲଘୁ ବ୍ୟାପାର ମନ୍ତ୍ରୀ ଅଛନ୍ତି। ଗତ ଶୁକ୍ରବାର ଶାହାଜାହାନପୁରରେ ଏକ ଯୋଗ କାର୍ଯ୍ୟକ୍ରମରେ ସେ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଏଥିରେ ଅନ୍ୟ କେତେଜଣ ମନ୍ତ୍ରୀ, ନେବା ଏବଂ ବିଶିଷ୍ଟ ବ୍ୟକ୍ତି ସାମିଲ ହୋଇଥିଲେ। ଏହି ଅବସରରେ ୱାଡେଡ୍ ଜଣେ ସରକାରୀ କର୍ମଚାରୀଙ୍କୁ ତାଙ୍କ ଜୋତାର ଫିତା ବାନ୍ଧିବାକୁ କହିଥିଲେ। ସରକାରୀ ବାବୁ ଜଣକ ତଳେ ବସି ତାଙ୍କ ଗୋଡ଼ରେ ଜୋତା ଫିତା ବାନ୍ଧୁଥିବା ଭିଡିଓରେ ଦେଖିବାକୁ ମିଳିଛି। ବିଜେପିର ଏହି ମନ୍ତ୍ରୀ ଜଣକ ନିଜ କ୍ଷମତାର ଅପବ୍ୟବହାର କରିଥିବାରୁ ତାଙ୍କୁ ବିଭିନ୍ନ ମହଲରେ ସମାଲୋଚନା କରାଯାଉଛି। କିନ୍ତୁ ସେ ଭାରତର ସଂସ୍କୃତି ଓ ପରମ୍ପରାର ଉଦାହରଣ ଦେଇ କୌଣସି ଭୁଲ କରି ନ ଥିବା କହିଛନ୍ତି।
ମନ୍ତ୍ରୀ କହିଛନ୍ତି, ଯଦି କେହି ଭାଇ, ଭଣଜା କିମ୍ବା ପରିବାରର ସଦସ୍ୟ ମୋତେ ଜୋତା ପିନ୍ଧାଇ ଦିଅନ୍ତି, ତେବେ ମନେରଖ ଯେ ଏହା ଆମର ସେହି ଦେଶ, ଯେଉଁଠି ରାଜ ସିଂହାସନରେ ଭଗବାନ ରାମଙ୍କ କଠଉ ରଖି ଭରତ ୧୪ ବର୍ଷ ଶାସନ କରିଥିଲେ। ଆପଣମାନଙ୍କୁ ତ ଏହାର ପ୍ରଶଂସା କରିବା ଦରକାର।
ଉଲ୍ଲେଖଯୋଗ୍ୟ, ପୂର୍ବରୁ ଓଡ଼ିଶାର ଜଣେ କ୍ୟାବିନେଟ ମନ୍ତ୍ରୀ ଯୋଗେନ୍ଦ୍ର ବେହେରା ଅନୁରୂପ ଏକ ଘଟଣା ପାଇଁ ସମାଲୋଚନାର ଶିକାର ହୋଇଥିଲେ। କେନ୍ଦୁଝରରେ ସ୍ବାଧୀନତା ଦିବସ ଉତ୍ସବ ପାଳନ ସମୟରେ ସେ ତାଙ୍କ ବ୍ୟକ୍ତିଗତ ସୁରକ୍ଷା କର୍ମୀଙ୍କୁ ନିଜ ଜୋତାର ଫିତା ବନ୍ଧାଇଥିଲେ।
