ଆଜି ଓଡ଼ିଶା ଆସୁଛନ୍ତି ଯୋଗୀ; ଭବାନୀପାଟଣା, ଖୋର୍ଦ୍ଧାରେ କର୍ମୀ ସମାବେଶରେ ଯୋଗଦେବେ

ଭୁବନେଶ୍ଵର: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବୁଧବାର ଓଡ଼ିଶା ଆସୁଛନ୍ତି। ସେ ଭବାନୀପାଟଣା ଏବଂ ଖୋର୍ଦ୍ଧାରେ ଅନୁଷ୍ଠିତ ହେବାକୁ ଥିବା ଦଳୀୟ ସମାବେଶରେ ଯୋଗଦେଇ କର୍ମୀମାନଙ୍କୁ ଉଦବୋଧନ ଦେବେ। ଏଥିପାଇଁ ଓଡ଼ିଶା ବିଜେପି ପକ୍ଷରୁ ସମସ୍ତ ପ୍ରସ୍ତୁତି ସରିଛି। ଭବାନୀପାଟଣାରେ ଆୟୋଜିତ ହେବାକୁ ଥିବା କାର୍ଯ୍ୟକ୍ରମରେ କଳାହାଣ୍ଡି, କନ୍ଧମାଳ, କେରାପୁଟ, ନବରଙ୍ଗପୁର, ବଲାଙ୍ଗୀର ଜିଲାର ୫୦ ହଜାର କର୍ମୀ ଯୋଗଦେବାର କାର୍ଯ୍ୟକ୍ରମ ରହିଛି। ପୂର୍ବାହ୍ନ ପ୍ରାୟ ସାଢ଼େ ୧୧ଟାରେ ଯୋଗୀ ହେଲିକପ୍ଟର ଯୋଗେ ଭବାନୀପାଟଣାରେ ପହଞ୍ଚିବେ। ସେଠାରୁ କାର ଯୋଗେ ମା’ ମାଣିକେଶ୍ଵରୀ ମନ୍ଦିର ଯାଇ ପୂଜାର୍ଚ୍ଚନା କରିବା ପରେ ସଭାରେ ଉଦବୋଧନ ଦେବେ। ଅପରାହ୍ନ ପ୍ରାୟ ୨ଟାରେ ଯୋଗୀ ଭବାନୀପାଟଣାରୁ ଖୋର୍ଦ୍ଧାର ନାଚୁଣୀଠାରେ ହେବାକୁ ଥିବା ସମାବେଶ ସ୍ଥଳକୁ ଆସିବେ।