କିଭ୍: ରୁଷ ଓ ୟୁକ୍ରେନ୍ ମଧ୍ୟରେ ଯୁଦ୍ଧ ଥମିବାର ନାଁ ନେଉନାହିଁ । ପ୍ରତ୍ୟେକ ଦିନ ଉଭୟଙ୍କ ମଧ୍ୟରେ ଗୁଳିବିନିମୟ ଜାରି ରହିଛି । ହେଲେ ରୁଷ-ୟୁକ୍ରେନ୍ ଯୁଦ୍ଧ ଯୋଗୁ ୟୁରୋପ ଏକ ଭୟଙ୍କର ପରିସ୍ଥିତିର ସମ୍ମୁଖିନ ହୋଇଛି । ଗତ ଶନିବାର ଦିନ ପରମାଣୁ ପ୍ଲାଣ୍ଟ ଚାରିପଟେ ଗୁଳିବିନିମୟ ହୋଇଥିବା କୁହାଯାଉଛି । ଯେଉଁଥିପାଇଁ ୟୁକ୍ରେନ୍ ଓ ରୁଷ ପରସ୍ପରକୁ ଦାୟୀ କରୁଛନ୍ତି । ଘଟଣାର ଯାଞ୍ଚ କରିବାକୁ ମିଳିତ ଜାତିସଂଘର ଆନ୍ତର୍ଜାତୀୟ ଆଣବିକ ଶକ୍ତି ଏଜେନ୍ସି (ଆଇଏଇଏ)କୁ ଅନୁମତି ଦିଆଯାଇନାହିଁ ।
ସେପଟେ ଏହି ଘଟଣାକୁ ନେଇ ୟୁକ୍ରେନ୍ ତାହାର ଅଭିଯୋଗ ରଖିଛି । ୟୁକ୍ରେନ୍ କହିଛି କି, ରୁଷ ଏହି ଆକ୍ରମଣ କରିଛି । ରୁଷ ମଧ୍ୟ ୟୁକ୍ରେନ୍ ବିରୋଧରେ ପାଲଟା ଅଭିଯୋଗ ଆଣି କହିଛି ଯେ, ୟୁକ୍ରେନ୍ ପରମାଣୁ ଇନ୍ଧନ ଭଣ୍ଡାର ଉପରେ ବେପରୁଆ ଭାବରେ ଗୁଳି ଚଳାଇଛି । ଜାତୀୟ ଗଣମାଧ୍ୟମର ସୂଚନା ଅନୁଯାୟୀ ୟୁକ୍ରେନ୍ ୪ଟି ସେତୁକୁ ଧ୍ୱଂସ କରିଦେଇଛି । ଯାହାକି ରୁଷ ସୈନିକଙ୍କ ପାଇଁ ବହୁ ଗୁରୁତ୍ୱପୂର୍ଣ୍ଣ ଥିଲା । ଗତ ଶନିବାର ଓ ରବିବାରର ଆକ୍ରଣରେ ରୁଷିଆର ୩୫ ସୈନିକଙ୍କୁ ୟୁକ୍ରେନ୍ ହତ୍ୟା କରିଥିବା ଦାବି କରିଛି ।
ତାହା ସହ ୟୁକ୍ରେନ୍ ରୁଷର ଅନେକ ଯୁଦ୍ଧାସ୍ତ୍ର ନଷ୍ଟ କରିଥିବା ମଧ୍ୟ କହିଛି । ସୂଚନା ଥାଉ କି ଗତ ୬ ମାସରୁ ଊର୍ଦ୍ଧ୍ଵ ସମୟ ହେବ ରୁଷ ଓ ୟୁକ୍ରେନ୍ ମଧ୍ୟରେ ଯୁଦ୍ଧ ଜାରି ରହିଛି । ଏହି ଯୁଦ୍ଧରେ ଅନେକ ଲୋକଙ୍କ ମୃତ୍ୟୁ ହୋଇଥିବା ବେଳେ ଦୁଇ ଦେଶ ବହୁ କ୍ଷୟକ୍ଷତି ସହିଲେଣି । ବାରମ୍ବାର ରୁଷ ୟୁକ୍ରେନ୍ ଉପରେ ଆକ୍ରମଣ କରୁଛି । ୟୁକ୍ରେନ୍ ମଧ୍ୟ ରୁଷକୁ ପାଲଟା ଆକ୍ରମଣ କରୁଥିବା ଦେଖିବାକୁ ମିଳୁଛି । ଦୁହିଁଙ୍କ ମଧ୍ୟରେ ଯୁଦ୍ଧ ଥମୁନଥିବା ବେଳେ ଆହୁରି ଯୁଦ୍ଧ ତୀବ୍ର ହେଉଥିବା ଦେଖିବାକୁ ମିଳୁଛି । ଯୁଦ୍ଧର ପ୍ରଭାବ ବିଶେଷକରି ବାଣିଜ୍ୟିକ କାରବାର ଉପରେ ପଡ଼ୁଛି ।
Comments are closed.