ନୂଆଦିଲ୍ଲୀ : ନିକଟରେ ଭାରତର ପ୍ରମୁଖ କ୍ୟାବ୍ ଏଗ୍ରିଗେଟର କମ୍ପାନୀ ଉବରକୁ କେନ୍ଦ୍ରୀୟ ଉପଭୋକ୍ତା ସଂରକ୍ଷଣ ପ୍ରାଧିକରଣ ତରଫରୁ ନୋଟିସ୍ ଜାରି କରାଯାଇଥିଲା । ଗତ କିଛି ଦିନ ଧରି ଯେବେ ଉବର ଉପଭୋକ୍ତା କ୍ୟାବ୍ ବୁକ୍ କରିବାକୁ ସର୍ଚ୍ଚ କରୁଛନ୍ତି ତେବେ ତାଙ୍କୁ ଆଗୁଆ ଟିପ୍ସ ଦେବା ପାଇଁ ଅନୁରୋଧ କରାଯାଉଛି । ଏନେଇ କମ୍ପାନୀକୁ ସ୍ପଷ୍ଟୀକରଣ ମଗାଯାଇଛି । ସରକାରଙ୍କ ଏହି ପଦକ୍ଷେପ ପରେ ଓଲା ଓ ରାପିଡୋକୁ ନେଇ ମଧ୍ୟ ଅଭିଯୋଗ ଆସୁଛି । ଏନେଇ ଯାଞ୍ଚ କରାଯାଉଛି ବୋଲି ଉପଭୋକ୍ତା ମାମଲା ମନ୍ତ୍ରୀ ପ୍ରହଲ୍ଲାଦ ଯୋଶୀ ସୂଚନା ଦେଇଛନ୍ତି ।
ପ୍ରହଲ୍ଲାଦ ଯୋଶୀ ଉବର ବିରୁଦ୍ଧରେ ଅଭିଯୋଗ ଆସିବା ପରେ ମାମଲାକୁ ଗୁରୁତର ସହ ନେଇ ସାମାଜିକ ଗଣମାଧ୍ୟମ ପ୍ଲାଟଫର୍ମ ଏକ୍ସରେ ଏନେଇ ସୂଚନା ଦେଇଛନ୍ତି । ସେ ଲେଖିଛନ୍ତି ଯେ ଆଗୁଆ ଟିପ୍ସ ମାଗିବା ଚିନ୍ତାଜନକ । ତ୍ବରିତ ସେବା ପାଇବା ପାଇଁ ଗ୍ରାହକଙ୍କୁ ଆଗୁଆ ଟିପ୍ସ ମାଗିବା କିମ୍ବା ବାଧ୍ୟ କରିବା କେବଳ ଭୁଲ୍ ନୁହେଁ, ଏହା ଅନୁଚିତ ବ୍ୟାପାର ବ୍ୟବହାର ପରିସରରେ ଆସିଥାଏ । ଟିପ୍ସ ଇଛା ଅନୁସାରେ ଦିଆଯାଇଥାଏ, ଏହା କାହାର ଅଧିକାର ନୁହେଁ ।
Comments are closed.