ସମାଜ ଡିଜିଟାଲ ଡେସ୍କ: ନେପାଳ ପରି ତାମିଲନାଡୁରେ ରାଜ୍ୟ ସରକାରଙ୍କ ବିରୋଧରେ ଜେନ୍-ଜେଡ ଭଳି ଆନ୍ଦୋଳନ କରିବାକୁ ଯୁବପିଢ଼ିଙ୍କୁ ଉସୁକାଉଥିଲେ ଟିଭିକେ ନେତା। ତାମିଲ ଅଭିନେତା ବିଜୟଙ୍କ ଦଳ ଟିଭିକେର ଜଣେ ନେତା ଅଧବ ଅର୍ଜୁନ ସୋସିଆଲ ମିଡିଆରେ ଏକ ପୋଷ୍ଟ କରି ନେପାଳ ପରି ତାମିଲନାଡୁରେ ସରକାର ବିରୋଧରେ ଜେନ-ଜେଡ ଆନ୍ଦୋଳନ କରିବାକୁ ଯୁବପିଢ଼ିଙ୍କୁ ଆହ୍ବାନ କରିଥିଲେ। କିନ୍ତୁ ପରେ ତାହାକୁ ସେ ହଟାଇ ଦେଇଥିଲେ। ହେଲେ ଏ ନେଇ ପୁଲିସ ପକ୍ଷରୁ ତାଙ୍କ ବିରୋଧରେ ମାମଲା ରୁଜୁ କରାଯାଇଛି।
ଡିଲିଟ କରିଦିଆଯାଇଥିବା ପୋଷ୍ଟରେ ଅର୍ଜୁନ ଲେଖିଥିଲେ, ରାଜ୍ୟରେ ଆଇନଶୃଙ୍ଖଳା ଫେରାଇ ଆଣିବାର କେବଳ ଏକମାତ୍ର ବାଟ ହେଉଛି ଯୁବ ଆନ୍ଦୋଳନ। ଶ୍ରୀଲଙ୍କା ଏବଂ ନେପାଳରେ ନିକଟରେ ହୋଇଥିବା ଜେନ-ଜେଡ ଆନ୍ଦୋଳନ ପରି ଏଠାରେ ବି ଏକ ଆନ୍ଦୋଳନ ହେବା ଜରୁରୀ।
ତେବେ ଏହି ପୋଷ୍ଟକୁ ଡିଏମକେ ପକ୍ଷରୁ ନିନ୍ଦା କରାଯାଇଥିଲା। ଏହା ଭାରତର ସର୍ବଭୌମତ୍ଵ ଏବଂ ସଂହତି ପ୍ରତି ବିପଦ ବୋଲି କୁହାଯାଇଥିଲା। ପରବର୍ତ୍ତୀ ସମୟରେ ଅର୍ଜୁନ ଉକ୍ତ ପୋଷ୍ଟକୁ ହଟାଇ ଦେଇଥିଲେ। ଡିଏମକେର ସାଧାରଣ ସମ୍ପାଦକ ଏ. ରାଜା କହିଛନ୍ତି, ଅଧବ ଅର୍ଜୁନ ଏକ୍ସ’ରେ ପୋଷ୍ଟ କରି ନେପାଳ ଭଳି ତାମିଲନାଡୁରେ ଆନ୍ଦୋଳନ କରିବା କଥା କହୁଛନ୍ତି। କିନ୍ତୁ ଆମ ରାଜ୍ୟରେ ଅଭିବୃଦ୍ଧି ହାର ଦେଶର ହାରାହାରି ଅବିଭୃଦ୍ଧି ତୁଳନାରେ ଭଲ ରହିଛି। ତାମିଲନାଡୁ ଏକ ଶାନ୍ତିପୂର୍ଣ୍ଣ ରାଜ୍ୟ।
