ଚେନ୍ନଇ: ବେଦାନ୍ତର ଷ୍ଟେରଲାଇଟ୍ କାରଖାନା ବନ୍ଦ ଦାବିରେ ହୋଇଥିବା ଜନଆକ୍ରୋଶକୁ ପ୍ରଶମିତ କରିବା ପାଇଁ ପୁଲିସ ଗୁଳି ଚଳାଇଥିଲା। ପୁଲିସ ଗୁଳିରେ ୧୩ ଜଣ ଲୋକଙ୍କ ମୃତ୍ୟୁ ଘଟିଥିଲା। ସମଗ୍ର ଦେଶରେ ଆଲୋଡ଼ନ ସୃଷ୍ଟି କରିଥିବା ଏହି ଗୁଳିକାଣ୍ଡ ପାଇଁ କିଏ ଦାୟୀ, କାହା ଇଙ୍ଗିତରେ ପୁଲିସ ଗୁଳି ଚଳାଇବାକୁ ବାଧ୍ୟ ହୋଇଥିଲା ସେ ସବୁ ପ୍ରଶ୍ନର ଉତ୍ତର ମିଳିଛି। ଜଣେ ପ୍ରଶାସନିକ ଅଧିକାରୀଙ୍କ ନିର୍ଦେଶରେ ପୁଲିସ ଗୁଳି ଚଳାଇଥିବା ଜଣାପଡ଼ିଛି। ଶେଖର ନାମକ ଏହି ଅଧିକାରୀ ଜଣକ ଗୁଳିକାଣ୍ଡ ନିର୍ଦେଶ ଦେଇଥିବା ସ୍ୱୀକାର କରିଛନ୍ତି।
ଶେଖରଙ୍କ କହିବା ଅନୁଯାୟୀ ଉତ୍ତ୍ୟକ୍ତ ଲୋକମାନେ ଜିଲାପାଳଙ୍କ କାର୍ଯ୍ୟାଳୟ ଓ ନିକଟସ୍ଥ କମ୍ପାନୀର କର୍ମଚାରୀମାନେ ରହୁଥିବା ଘରେ ନିଅାଁ ଲଗାଇବା ପାଇଁ ଉଦ୍ୟମ କରିଥିଲେ। ସେମାନଙ୍କୁ ହିଂସାକାଣ୍ଡରୁ ବାରଣ କରିବାକୁ ମାଇକ ଯୋଗେ ପ୍ରଚାର କରାଯାଇଥିଲା। ତଥାପି ସେମାନେ ନ ଶୁଣିବାକୁ ପୁଲିସକୁ ସେ ଲାଠି ଚାର୍ଜ ନିର୍ଦେଶ ଦେଇଥିଲେ। କିନ୍ତୁ ଏହାର କୌଣସି ପ୍ରଭାବ ଆନ୍ଦୋଳନକାରୀଙ୍କ ଉପରେ ପଡ଼ି ନଥିଲା। ପୁଲିସ ପ୍ରଶାସନର ସବୁ ଉଦ୍ୟମ ବିଫଳ ହେବା ପରେ ଶେଷରେ ବାଧ୍ୟ ହୋଇ ଗୁଳି ଚଳାଇବା ପାଇଁ ସେ ପୁଲିସକୁ ନିର୍ଦେଶ ଦେଇଥିଲେ। କେତେକ ନିର୍ଦ୍ଦିଷ୍ଟ ଗୋଷ୍ଠୀର କର୍ମକର୍ତ୍ତା ଏହି ହିଂସାକାଣ୍ଡ ପାଇଁ ଲୋକଙ୍କୁ ଉସ୍କାଉଥିବା ସେ କହିଛନ୍ତି।
ଅପରପକ୍ଷରେ ପୁଲିସ୍ ମାଇକ୍ଯୋଗେ ପ୍ରଚାର କରିନାହିଁ ବୋଲି କିଛି ସ୍ଥାନୀୟ ଲୋକେ କହିଛନ୍ତି। ଏପରିକି ନିୟମ ଅନୁଯାୟୀ ପୁଲିସ ପ୍ରଥମେ ରବର ଗୁଳି ଚାଳନା କରିବା କଥା। କିନ୍ତୁ କୌଣସି ନୀତି ନିୟମ ପାଳନ ନ କରି ପୁଲିସ ସିଧାସଳଖ ଗୁଳି କରିଛି। ଯଦି ହିଂସା କିମ୍ବା ପୋଡ଼ା ଜଳା ପାଇଁ ଯୋଜନା ଥା’ନ୍ତା ତେବେ ଲୋକମାନେ ସେମାନଙ୍କ ପିଲା ଛୁଆଙ୍କୁ ଧରି ଆନ୍ଦୋଳନକୁ ଓହ୍ଲାଇ ନଥାନ୍ତେ। ପୁଲିସ ନିଜେ ନିଅାଁ ଲଗାଇ ଲୋକଙ୍କ ଉପରେ ଦୋଷ ଲଦୁଛି ବୋଲି କିଛି ଲୋକ ଅଭିଯୋଗ କରିଛନ୍ତି। ସେଠାରୁ ଉତ୍ତୋଳିତ ଏକ ଭିଡିଓ ଚିତ୍ରରେ ‘ଅତିକମ୍ରେ ଜଣେ ମରିବା ଦରକାର’ ବୋଲି କେହି ଜଣେ କହୁଥିବା ଶୁଣିବାକୁ ମିଳୁଛି।
କାହା ନିର୍ଦେଶରେ ଟୁଟିକୋରିନ୍ରେ ଚାଲିଥିଲା ଗୁଳି?
Popular Categories
Previous article
Next article