ସମାଜ ଡିଜିଟାଲ ଡେସ୍କ: ତୁର୍କୀର ଟିକ୍ଟକ୍ ଇନଫ୍ଲୁଏନସର କୁବରା ଅୟକୁଟଙ୍କ ପରଲୋକ ଘଟିଛି। ୨୬ ବର୍ଷୀୟା କୁବରା ନିଜକୁ ନିଜେ ବିବାହ କରିଥିବା ଭିଡିଓ ପାଇଁ ବେଶ୍ ଲୋକପ୍ରିୟ ହୋଇଥିଲେ। ତୁର୍କୀ ଗଣମାଧ୍ୟମ ସୂଚନା ଅନୁସାରେ, ସୋମବାର ଇସ୍ତାନବୁଲର ସୁଲତାନବେଲି ଜିଲାର ଏକ ବିଳାସପୂର୍ଣ୍ଣ ଆପାର୍ଟମେଣ୍ଟର ପଞ୍ଚମ ମହଲାରୁ ଖସିପଡ଼ି କୁବରା ଅୟକୁଟଙ୍କ ମୃତ୍ୟୁ ଘଟିଛି। ସ୍ଥାନୀୟ ଅଧିକାରୀ ତାଙ୍କ ମୃତଦେହ ନିକଟରୁ ଏକ ସୁଇସାଇଡ୍ ନୋଟ୍ ମଧ୍ୟ ଜବତ କରିଛନ୍ତି। ବର୍ତ୍ତମାନସୁଦ୍ଧା ମୃତ୍ୟୁର କାରଣ ଅସ୍ପଷ୍ଟ ରହିଛି। ଘଟଣାର ତଦନ୍ତ ଚାଲିଛି। ପ୍ରାଥମିକ ତଦନ୍ତରୁ ଏହା ଆତ୍ମହତ୍ୟା ବୋଲି ଜଣାପଡ଼ିଛି।
ମୃତ୍ୟୁ ପୂର୍ବରୁ ଅୟକୁଟ ସାମାଜିକ ଗଣମାଧ୍ୟମରେ ଏକ ଚିନ୍ତାଜନକ ପୋଷ୍ଟ କରିଥିଲେ। ମୃତ୍ୟୁର ଠିକ୍ ପୂର୍ବରୁ ସେ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ନିଜର ଓଜନ ବୃଦ୍ଧି ଅଭିଜ୍ଞତା ବିଷୟରେ ଏକ ଦୁଃଖଭରା ବାର୍ତ୍ତା ଲେଖିଥିଲେ। ସେ ଲେଖିଥିଲେ, ମୁଁ ମୋର ଶକ୍ତି ଜମା କରିଛି, କିନ୍ତୁ ମୋର ଓଜନ ବଢୁନାହିଁ। ଓଜନ ପ୍ରତିଦିନ କିଛି କିଲୋଗ୍ରାମ ହ୍ରାସ ପାଉଛି। ମୁଁ ଜାଣିନି କ’ଣ କରିବି? ମୋତେ ତୁରନ୍ତ ଓଜନ ବଢାଇବାର ଆବଶ୍ୟକତା ରହିଛି।
ବିଶେଷକରି ୨୦୨୩ରେ ସେ ନିଜର ଅଣପାରମ୍ପରିକ ବିବାହ ଓ୍ବେଡିଙ୍ଗ୍ ଓ୍ବିଦାଉଟ୍ ଏ ଗ୍ରୁମ୍ ସିରିଜ୍କୁ ନେଇ ଖୁବ୍ ଲୋକପ୍ରିୟତା ହାସଲ କରିଥିଲେ। ସେ ଏକ ସୁନ୍ଦର ଧଳା ଗାଉନ୍ ଏବଂ କପାଳରେ ଏକ ଟିଆରା ପିନ୍ଧି ନିଜକୁ ନିଜେ ବିବାହ କରିଥିଲେ। ଏହି ସମୟରେ ସେ କହିଥିଲେ, ମୋତେ ନିଜ ପାଇଁ କୌଣସି ଉପଯୁକ୍ତ ବର ମିଳୁନାହିଁ।
