ଟ୍ରକ ପଛକୁ ଧକ୍କା ଦେଲା ଟ୍ରକ: ୨ ଗୁରୁତର

ଅମର୍ଦ୍ଦାରୋଡ଼ : ରୂପସା ଥାନା ୧୬ ନମ୍ବର ଜାତୀୟ ରାଜପଥର ମିରିଗିମୁଣ୍ତୀ ଛକ ନିକଟରେ ଚଳନ୍ତା ଟ୍ରକର ପଛକୁ ଅନ୍ୟ ଏକ ଟ୍ରକ ଧକ୍କା ଦେବାରୁ କ୍ୟାବିନରେ ଚାପି ହୋଇ ଚାଳକ ସମେତ ଖଲାସୀ ଗୁରୁତର ଆହତ ହୋଇଛନ୍ତି। ସୂଚନା ଅନୁସାରେ ଶନିବାର କାଠ ବୋଝେଇ ଟ୍ରକ (ଡ଼ବ୍ଲ୍ୟୁବି ୨୯ବି ୭୪୦୦)ର ପଛରେ ଅନ୍ୟ ଏକ କାଜୁ ବୋଝେଇ ଟ୍ରକ (ଓଡ଼ି ୦୫ବିକେ ୯୨୧୬) ଆଗପଛ ହୋଇ ବାଲେଶ୍ବର ପଟୁ କଲକାତା ଅଭିମୁଖେ ଯାଉଥିଲେ।

ଏହି ସମୟରେ ମିରିଗିମୁଣ୍ତୀ ଛକ ନିକଟରେ ସାମନା ଟ୍ରକଟି ହଠାତ୍ ବ୍ରେକ ମାରିବାରୁ ପଛରେ ଥିବା ଟ୍ରକ(ଓଡ଼ି ୦୫ବିକେ ୯୨୧୬)ଟି ସାମନା ଟ୍ରକର ପଛକୁ ଜୋରରେ ଧକ୍କା ଦେଇଥିଲା। ଫଳରେ ଟ୍ରକଟିର କ୍ୟାବିନ ସମ୍ପୂର୍ଣ୍ଣ ରୂପେ ଭାଙ୍ଗିରୁଜି ଯାଇଥିବା ବେଳେ ଚାଳକ ଓ ଖଲାସୀ ଭିତରେ ଚାପି ହୋଇ ରହିଯାଇଥିଲେ।

ଖବର ପାଇ ବସ୍ତା ଦମକଳ ବାହିନୀ, ଜାତୀୟ ରାଜପଥ ପାଟ୍ରୋଲିଂ ପୁଲିସ ଏବଂ ରୂପସା ପୁଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟକୁ ତ୍ଵରାନ୍ବୀତ କରିଥିଲେ। ହାଇଡ଼୍ରୋଲିକ ଗ୍ୟାସ୍ କଟରରେ ଟ୍ରକର କ୍ୟାବିନକୁ କାଟି ଦୀର୍ଘ ୧ ଘଣ୍ଟା ପରେ ଦୁଇ ଜଣଙ୍କୁ ଟ୍ରକ ଭିତରୁ ଉଦ୍ଧାର ପରେ ଚିକିତ୍ସା ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ରୂପସା ଥାନା ପୁଲିସ ଟ୍ରକ ଦୁଇଟିକୁ ଜବତ କରି ଘଟଣାର ଅଧିକ ତଦନ୍ତ ଜାରି ରଖିଛି।