ଲକ୍ଷ୍ମୀପୁର: ରେଳ ଦୁର୍ଘଟଣାରେ କାମିରିଗୁମା ଥାନା ଅନ୍ତର୍ଗତ ଭିତରଗଡ଼ ନିକଟରେ ଜଣେ ଯୁବକଙ୍କ ମୃତ୍ୟୁ ଘଟିଛି । ମୃତକଙ୍କ ନାମ ରମେଶ ଜାନୀ, ବୟସ ୩୫ ଓ ଘର ଏହି ପଞ୍ଚାୟତ କାପ୍ସିପୁଟ ଗ୍ରାମରେ ବୋଲି ଜଣାପଡିଛି । ରମେଶ ସକାଳ ପ୍ରାୟ ୭ଟାରେ ଭିତରଗଡ଼ ସ୍କୁଲ ନିକଟରେ ରେଳ ଧାରଣା ପାର ହେଉଥବା ବେଳେ ରାୟଗଡ଼ା ପଟୁ କୋରାପୁଟ ଅଭିମୁଖେ ଯାଉଥିବା କୌଣସି ଏକ ମାଲବାହୀ ଟ୍ରେନ ତାଙ୍କୁ ଧକ୍କା ଦେଇଥିଲା। ଫଳରେ ସେ ତଳେ ପଡ଼ି ଯାଇଥିଲେ । ତାଙ୍କର ମୁହଁ ଓ ମୁଣ୍ଡରେ ଶକ୍ତ ଆଘାତ ଲାଗିବା ସହିତ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ଏହା ଦେଖି ଭିତରଗଡ଼ ଗ୍ରାମର ଲୋକମାନେ ସଙ୍ଗେସଙ୍ଗେ ରମେଶଙ୍କ ପରିବାରକୁ ଖବର ଦେବାରୁ ପରିବାର ଲୋକ ଆସି ଦେଖିବା ପରେ କାକିରିଗୁମା ଥାନାକୁ ଖବର ଦେଇଥିଲେ। ଖବରପାଇ କାକିରିଗୁମା ପୁଲିସ ଘଟଣାସ୍ଥଳରେ ପହଞ୍ଚି ପରିବାର ଲୋକଙ୍କୁ ପଚରାଉଚରା କରିବା ସହ ଦାମନଯୋଡ଼ିରୁ ଆମ୍ବୁଲାନ୍ସ ଯୋଗେ ଲକ୍ଷ୍ମୀପୁର ଗୋଷ୍ଟୀ ସ୍ୱାସ୍ଥ୍ୟକେନ୍ଦ୍ରକୁ ବ୍ୟବଚ୍ଛେଦ ପାଇଁ ଆଣିଥିଲେ । ଶବ ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କ ଜୀମା ଦେଇଛନ୍ତି। ଏନେଇ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ରମେଶ କୋଟପାଡ଼ ସ୍ୱାସ୍ଥ୍ୟ କେନ୍ଦ୍ରରେ ଆଟେଣ୍ଟାଣ୍ଡ ଭାବେ କାର୍ଯ୍ୟ କରୁଥିବା ପରିବାର ଲୋକଙ୍କ ସୂତ୍ରରୁ ଜଣାପଡ଼ିଛି।
