ଡେସ୍କ: ମୋବାଇଲ୍ କଲିଂରେ ସରକାର ଦିନକୁ ଦିନ ନୂଆ ପରିବର୍ତ୍ତନ ଆଣୁଛନ୍ତି । ଏବେ ଭାରତୀୟ ଦୂରସଞ୍ଚାର ନିୟାମକ କର୍ତ୍ତୃପକ୍ଷ (ଟ୍ରାଇ) ପକ୍ଷରୁ ଏକ ନୂତନ ନିଷ୍ପତ୍ତି ଗ୍ରହଣ କରାଯାଇଛି । ଏହାକୁ ନେଇ ଟ୍ରାଇ ତରଫରୁ ଟେଲିକମ୍ କମ୍ପାନୀଗୁଡ଼ିକୁ ଅବଗତ କରାଯାଇଛି । ଏହି ନିଷ୍ପତ୍ତି କାର୍ଯ୍ୟକାରୀ ହେଲେ ସବୁଠୁ ବେଶୀ ଲାଭବାନ ହେବେ ଉପଭୋକ୍ତା । କାରଣ ମୋବାଇଲ୍କୁ କଲ୍ ଆସିଲେ ନମ୍ବର ସହିତ କଲ୍ କରୁଥିବା ବ୍ୟକ୍ତିଙ୍କ ନାମ ଦେଖାଯିବ । ଏହା ଏକପ୍ରକାର ଟ୍ରୁ କଲର ପରି କାର୍ଯ୍ୟ କରିବ ।
ଏ ସମ୍ପର୍କରେ ଉପଭୋକ୍ତାମାନଙ୍କଠାରୁ ପ୍ରଥମେ ଅନୁମତି ନେବାକୁ ଟ୍ରାଇ ପକ୍ଷରୁ ଟେଲିକମ୍ କମ୍ପାନୀଗୁଡ଼ିକୁ କୁହାଯାଇଛି । ଉପଭୋକ୍ତାଙ୍କ ଅନୁମତି ମିଳିବା ପରେ ଏହି ଫିଚର କାର୍ଯ୍ୟକାରୀ ହେବ । ଅଜଣା ନମ୍ବରରୁ କଲ୍ ଆସିଲେ ବି ସେଥିରେ କଲ୍ କରୁଥିବା ବ୍ୟକ୍ତିଙ୍କ ନାମ ସ୍କ୍ରିନ୍ ଉପରେ ଆସିବ । ଏହା ସହାୟତାରେ ସାଇବର ଠକେଇ ହ୍ରାସ ପାଇବ । ଉପଭୋକ୍ତାମାନେ ଆଉ ସ୍କାମ୍ର ଶିକାର ହେବେ ନାହିଁ ବୋଲି କୁହାଯାଇଛି ।
ଏହି ସୁବିଧାକୁ ଟ୍ରାଇ କଲିଂ ନେମ୍ ପ୍ରେଜେଣ୍ଟେସନ(ସିଏନଏପି) ନାଁ ଦେଇଛି। ଏହାକୁ ଲାଗୁ କରିବା ପାଇଁ ସରକାରଙ୍କ ପକ୍ଷରୁ ପଦକ୍ଷେପ ନିଆଯାଉଛି ।
