ପାକ୍ ଗୁଳିରେ ୨ ଯବାନ ସହିଦ
ନୂଆଦିଲ୍ଲୀ : ଜାମ୍ମୁ କାଶ୍ମୀର ଅନ୍ତର୍ଗତ ଭାରତ-ପାକ୍ ନିୟନ୍ତ୍ରଣ ରେଖା ଏବଂ ଅନ୍ତର୍ଜାତୀୟ ସୀମାରେଖା ନିକଟରେ ପାକିସ୍ତାନ କ୍ରମାଗତ ଭାବେ ଯୁଦ୍ଧ ବିରତି ଉଲ୍ଲଙ୍ଘନ କରିଚାଲିଥିବାବେଳେ ମଙ୍ଗଳବାର ଭାରତକୁ ପୁନଃ ୨ ଯବାନଙ୍କ ଜୀବନର ମୂଲ୍ୟ ଦେବାକୁ ପଡ଼ିଛି। ରାଜୋରୀ ଜିଲା ଅନ୍ତର୍ଗତ ସୁନ୍ଦରବାଣୀସ୍ଥିତ ନିୟନ୍ତ୍ରଣ ରେଖାଠାରେ ପାକିସ୍ତାନୀ ସେନା ସୋମବାର ସନ୍ଧ୍ୟାରେ ଆଖିବୁଜା ଗୁଳିମାଡ଼ କରିଥିଲେ। ସନ୍ଧ୍ୟା ପ୍ରାୟ ୫ଟା୧୫ରେ ସ୍ୱୟଂଚାଳିତ ବନ୍ଧୁକ ତଥା ମୋର୍ଟାର ଦ୍ୱାରା ଏହି ଆକ୍ରମଣ ହୋଇଥିଲା। ଭାରତୀୟ ଯବାନମାନେ ତୁରନ୍ତ ଏହାର ଜବାବ ଦେଇଥିଲେ। ବେଶ୍ କିଛି ସମୟ ଧରି ସେଠାରେ ଗୁଳିବିନିମୟ ଜାରି ରହିଥିଲା। ଏଥିରେ ରାଇଫଲ୍ମ୍ୟାନ୍ ବିନୋଦ ସିଂହ ଏବଂ ଜ୍ୟାକି ଶର୍ମା ଏହି ଆକ୍ରମଣରେ ସହିଦ ହୋଇଛନ୍ତି ବୋଲି ପ୍ରତିରକ୍ଷା ମୁଖପାତ୍ର ଲେଫ୍ଟନାଣ୍ଟ କର୍ଣ୍ଣେଲ୍ ଦେବେନ୍ଦର ଆନନ୍ଦ କହିଛନ୍ତି।