ଗ୍ରସ୍ ଆଇଲେଟ୍: ୭ମାସ ତଳେ ଭାରତକୁ ଦିନିକିଆ ବିଶ୍ୱକପ ଜିତିବାରୁ ଅଟକାଇ ଟ୍ରଫି ଛଡାଇ ନେଇଥିଲା କଙ୍ଗାରୁ ଦଳ। ଫାଇନାଲରେ ଭାରତକୁ ପରାସ୍ତ କରି ବିଶ୍ୱ ଚାମ୍ପିୟନ ହୋଇଥିଲା। ଏବେ ଚଳିତ ଟି୨୦ ବିଶ୍ୱକପର ସେମିଫାଇନାଲରୁ ଅଷ୍ଟ୍ରେଲିଆକୁ ରୋକିବା ସହ ପ୍ରତିଶୋଧ ନେବାର ସୁଯୋଗ ଭାରତୀୟ ଦଳ ପାଖରେ ରହିଛି। ସୁପର-୮ ମ୍ୟାଚରେ ଆଫଗାନିସ୍ତାନଠାରୁ ଅଷ୍ଟ୍ରେଲିଆ ପରାସ୍ତ ହେବା ପରେ ଏହା ଚିନ୍ତାରେ ପଡିଛି। ସେମିରେ ପହଞ୍ଚିବାକୁ ହେଲେ ଆଜିର ମ୍ୟାଚରେ ଭାରତକୁ ଅଷ୍ଟ୍ରେଲିଆ ନିଶ୍ଚୟ ପରାସ୍ତ କରିବାକୁ ପଡିବ। ଅନ୍ୟପଟେ ଏହି ମ୍ୟାଚ ଜିତି ଅଷ୍ଟ୍ରେଲିଆକୁ ଟି-୨୦ ବିଶ୍ୱକପରୁ ବିଦା କରିବା ସହ ଗ୍ରୁପ୍-୮ର ଶୀର୍ଷରେ ରହିବା ସହ ଅପରାଜିତ ରହି ସେମିଫାଇନାଲ ଖେଳିବାକୁ ଭାରତ ସମସ୍ତ ପ୍ରୟାସ କରିବ। ନିକଟରେ ଏକାଧିକ ଆଇସିସି ଟୁର୍ଣ୍ଣାମେଣ୍ଟର ଫାଇନାଲରେ ଭାରତକୁ ଅଷ୍ଟ୍ରେଲିଆ ପରାସ୍ତ କରିଛି। ଏହି ଧାରା ବଦଳାଇବାକୁ ଭାରତ ଚାହିଁବ। ଦକ୍ଷିଣ ଆଫ୍ରିକା ସହ ଭାରତ ଆଦ୍ୟବଧି କୌଣସି ମ୍ୟାଚ ହାରିନାହାଁନ୍ତି। ସମସ୍ତ ବିଭାଗରେ ଭାରତ ଭଲ ପ୍ରଦର୍ଶନ କରୁଛି।
