ତିଗିରିଆ: ପ୍ରଧାନମନ୍ତ୍ରୀ କିଷାନ ସମ୍ନାନ ନିଧି ଯୋଜନାକୁ ନେଇ ତିଗିରିଆ ଅଞ୍ଚଳର ଚାଷୀମାନଙ୍କୁ ସଚେତନ କରିବା ଲାଗି ତିଗିରିଆ କୃଷି ସୂଚନା ଓ ପରାମର୍ଶ କେନ୍ଦ୍ର ଠାରେ ଏକ ଜରୁରୀ ବୈଠକ ଶନିବାର ଅନୁଷ୍ଠିତ ହୋଇଯାଇଛି । ସହକାରୀ କୃଷି ଅଧିକାରୀ ଦେବୀ ପ୍ରସାଦ ପୃଷ୍ଟିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନା ସମ୍ପର୍କରେ ଆଲୋଚନା କରାଯାଇଥିଲା ।
ଏଥିରେ ଚାଷୀମାନଙ୍କୁ ବର୍ଷକୁ ମିଳୁଥିବା ଦୁଇଟି କିସ୍ତିର ପ୍ରୋତ୍ସାହନ ରାଶି କିଭଳି ଅଞ୍ଚଳର ସମସ୍ତ ଚାଷୀମାନେ ପାଇପାରିବେ ଏବଂ ଏଥିପାଇଁ ଆବଶ୍ୟକ ହେଉଥିବା ପଞ୍ଜୀକରଣ ବ୍ୟବସ୍ଥା ସମ୍ପର୍କରେ ସମୀକ୍ଷା କରାଯାଇଥିଲା । ଯେଉଁ ଚାଷୀମାନେ ଇ-କେୱାଇସି କରିନାହାଁନ୍ତି ସେମାନେ ନିଜର ଆଧାର ପତ୍ର ଓ ବ୍ୟବହାର କରୁଥିବା ମୋବାଇଲ ନମ୍ବର ୧୫ ଅଗଷ୍ଟ ସୁଦ୍ଧା ସହଜ ଜନସେବା କେନ୍ଦ୍ରଗୁଡ଼ିକରେ କରାଇ ନେବାକୁ ବୈଠକରେ ଅନୁରୋଧ କରାଯିବା ସହିତ ବିଭାଗୀୟ କର୍ମଚାରୀମାନେ ଏ ନେଇ ବ୍ୟାପକ ଜନସଚେତନା କରିବା ଦିଗରେ ଆଗଭର ହେବାକୁ ନିଷ୍ପତ୍ତି ହୋଇଥିଲା ।
ଏହା ନକଲେ ଆଗାମୀ ଦିନରେ କୃଷି ଭିତ୍ତିକ ସରକାରୀ ପ୍ରୋତ୍ସାହନ ରାଶିର କିସ୍ତି ପାଇବାରୁ ଚାଷୀମାନେ ବଞ୍ଚିତ ହେବେ ବୋଲି ସୂଚନା ଦିଆଯାଇଥିଲା । ଏଥି ପାଇଁ ତିଗିରିଆ କୃଷି ବିଭାଗ ପକ୍ଷରୁ ଅନୁଷ୍ଠିତ ବୈଠକ ସରିବା ପରେ ବ୍ଲକର ସମସ୍ତ ଚାଷୀମାନଙ୍କୁ ସଚେତନ କରିବା ପାଇଁ ଏକ ସଚେତନ ଗାଡ଼ି ବ୍ଲକର ୧୪ ପଞ୍ଚାୟତକୁ ପରିକ୍ରମା କରିବା ଲାଗି ଶୁଭାରମ୍ଭ କରାଯାଇଥିଲା । ଆଜିର ଏହି କାର୍ଯ୍ୟକ୍ରମରେ ବ୍ଲକ କୃଷି ଅଧିକାରୀ ମନୋଜ କୁମାର ଚୌଧୁରୀ, ମନ୍ତ୍ରୀଙ୍କ ପ୍ରତିନିଧି ଭାବେ ଗୌରହରି ପରିଡ଼ାଙ୍କ ସମେତ ସମସ୍ତ ଗ୍ରାମ୍ୟ କୃଷି କର୍ମଚାରୀ, ଆତ୍ମା ସଦସ୍ୟ, ଉଦ୍ୟାନ କୃଷି କର୍ମଚାରୀମାନେ ଉପସ୍ଥିତ ଥିଲେ ।
Comments are closed.