ଡେରିରେ ହେଉପଛେ ପାପର ଫଳ ଏଇଠି ମିଳେ!ଜୀବନର ଶେଷ ସମୟରେ ଜେଲ୍‌ରେ

ପାଟଣା – ବିହାରରେ ଘଟିଛି ଏକ ଅଭାବନୀୟ ଘଟଣା । ୧୯ ବର୍ଷ ଏବଂ ୨୧ ବର୍ଷ ବୟସରେ ଦୁଇ ଜଣ କରିଥିଲେ ଚୋରି । ଏବେ ୬୮ ଏବଂ ୭୦ ବର୍ଷ ବୟସରେ ଗିରଫ ହୋଇଛନ୍ତି । ମାତ୍ର ପୁଲିସକୁ ଏହି ଚୋରମାନଙ୍କୁ ଧରିବା ପାଇଁ ୪୯ ବର୍ଷ ଲାଗିଗଲା । ୧୯୭୪ ମସିହାରେ ବିହାରର ସୋନପୁର ଅଞ୍ଚଳରେ ଏକ ବଡ ଧରଣର ଚୋରି ହୋଇଥିଲା । ରେଳ ବିଭାଗରୁ ଲୁହା ଚୋରି ହୋଇଥିବାର ମାମଲା ରୁଜୁ କରାଯାଇଥିଲା । ୨୩/୧୯୭୪ ସଂଖ୍ୟାରେ ରେଳବାଇ ଥାନାରେ ମାମଲା ରୁଜୁ କରାଯାଇଥିଲା । ୪୯ ବର୍ଷ ପରେ ଆର୍‌ପିଏଫ୍‌ ଏଥିରେ ଜଡିତ ଦୁଇ ଅପରାଧି ପ୍ରଭୁ ରାୟ ଏବଂ ଗୋଧନ ଭଗତଙ୍କୁ ଗିରଫ କରିଛି ।

ଗତ କିଛି ଦନି ଧରି ଏହି ମାମଲାରେ ପୁଲିସ ପକ୍ଷରୁ ବାରମ୍ବାର ଚଢଉ କରାଯାଇଥିଲା । ୪୯ ବର୍ଷ ପୂର୍ବରୁ ଅପରାଧିମାନେ ଗାଁରୁ ସମ୍ପତ୍ତି ବିକ୍ରି କରି ଫେରାର ହୋଇଯାଇଥିଲେ । ହେଲେ ନୟାଗାଁଓରୁ ପୁଲିସ ସେମାନଙ୍କୁ ଗିରଫ କରିଛି । ଜୀବନର ଶେଷ ସମୟରେ ଅଶାନ୍ତିରେ ଜେଲ୍‌ ଭିତରେ କଟୁଛି । ୨୦୦୧ ମସିହାରେ ଏମାନଙ୍କୁ ଗିରଫ କରିବା ପାଇଁ ଅଦାଲତ ଓ୍ୱାରେଣ୍ଟ ଜାରି କରିଥିଲେ । ହେଲେ ପୁଲିସ ଏମାନଙ୍କୁ ଏତେ ବିଳମ୍ବରେ ଗିରଫ କରିଛି । ୪୯ ବର୍ଷ ତଳର ଚୋରି ପାଇଁ ଦୁଇ ଅପରାଧିଙ୍କ ଶେଷ ଜୀବନ ଏକ ପ୍ରକାର ଜେଲ୍‌ ଭିତରେ କଟିବ ।