ଠାକୁରମୁଣ୍ଡା : ଠାକୁରମୁଣ୍ଡା ବ୍ଲକ ଅଞ୍ଚଳର ୧୮ଟି ପଞ୍ଚାୟତର ବିଭିନ୍ନ ହାଟ, ଫୁଟବଲ ଖେଳ, ଯାନିଯାତ୍ରା ଜନଗହଳି ସ୍ଥାନ ଗୁଡିକରେ ବେଆଇନ ଭାବରେ କୁକୁଡା ଲଢେଇ ଓ ଜୁଆଖେଳ ବେଧଡକ ଚାଲୁଥିବାରୁ ଅସନ୍ତୋଷ ଦିନକୁ ଦିନ ବୃଦ୍ଧି ପାଇବାକୁ ଲାଗିଛି । ହାଟ ଗୁଡିକ କରେ ବେଆଇନ କୁକୁଡା ଲଢେ଼ଇ ଯୋଗୁଁ ଅନେକ ଆଦିବାସୀ ପରିବାରର ଲୋକମାନେ ସର୍ବସ୍ୱାନ୍ତ ହୋଇ ଘରକୁ ଫେରୁଥିବାର ନଜର ରହିଛି । ଏହାକୁ ପୁଲିସ ପକ୍ଷରୁ ଧରପଗଡ କରାଯାଇଥାଏ । ଅନେକ ଅଞ୍ଚଳରେ ଏହି କାରଣରୁ ଏହାକୁ ବନ୍ଦକରି ଦିଆଯାଇଥିଲେ ହେଁ କେତେକ ହାଟ ମାନଙ୍କରେ ଏବେ ମଧ୍ୟ କୁକୁଡା ଲଢେଇ ସାଙ୍ଗକୁ ଜୁଆପାଲି ଖେଳ ଚାଲୁଛି । ସେହିପରି ସାତକୋଶିଆ,ପଡିଆବେଡା, ରାଇପଦା, ଆଦି ଅଞ୍ଚଳରେ ମଧ୍ୟ ବେଧଡକ କୁକୁଡା ଲଢେଇ ଚାଲୁଥିବାରୁ ଧରପଗଡ କରିବାକୁ ସାଧାରଣରେ ଦାବି ହେଉଛି ।
ଏହି କୁକୁଡା ଲଢେଇ ବେଳେ ଲୋକମାନେ ନିଜ ନିଜ ପସନ୍ଦର କୁକୁଡା ଜିତିବା ଆଶା ରଖି ବାଜି ଲଗାଇଥାନ୍ତି । ଯେଉଁ କୁକୁଡା ଜିତିଥାଏ, ତା ଉପରେ ବାଜି ଲଗାଇଥିବା ଲୋକମାନେ ହାରିଯାଇଥିବା ଲୋକଙ୍କ ଠାରୁ ବାଜି ମୁତାବକ ଟଙ୍କା ନେଇଥାନ୍ତି । ଅନେକ ସମୟରେ ଏହି ଜୁଆଖେଳ ହିଂସା ରୂପ ନେଇଥାଏ । ତେବେ ଏଥିପ୍ରତି ଠାକୁରମୁଣ୍ଡା ଓ ମହୁଲଡିହା ପୁଲିସ ପକ୍ଷରୁ ବ୍ୟାପକ ପାଟ୍ରୋଲିଂ ଏବଂ ଚଢ଼ାଉକୁ ଜୋରଦାର କରାଯିବାକୁ ବୁଦ୍ଧିଜୀବି ମହଲରେ ଦାବି ହୋଇଛି ।
Comments are closed.