ଠାକୁରମୁଣ୍ଡା : କରଞ୍ଜିଆ ବନଖଣ୍ଡ ସାତକୋଶିଆ ବନ୍ୟପ୍ରାଣୀ ରେଞ୍ଜ ଅଞ୍ଚଳର ଦୁଆରଶୁଣୀ ଜଙ୍ଗଲରୁ ଶୁକ୍ରବାର ସକାଳେ ଶିକାରୀ ମାନେ ଶିକାର କରିଥିବା ୮ କେଜି ଓଜନର କୁଟୁରା ମାଂସ ଜବତ କରିବା ସହ ଘଟଣାରେ ସମ୍ପୃକ୍ତ ୫ଜଣ ଶିକାରୀକୁ ସାତକୋଶିଆ ବନ୍ୟ ପ୍ରାଣୀ ବିଭାଗ ଗିରଫ କରିଛି।
ବିଶେଷ ସୂତ୍ରରୁ ଖବର ପାଇ ରେଞ୍ଜ ଅଧିକାରୀ ରବିନ୍ଦ୍ର କୁମାର ମହାନ୍ତଙ୍କ ନେତୃତ୍ୱରେ ଏକ ଟିମ୍ ଦୁଆରଶୁଣୀ ଜଙ୍ଗଲରେ ଚଢ଼ାଉ କରିଥିଲେ। ଶିକାରୀମାନେ ଏକ କୁଟୁରାକୁ ଶିକାର କରି ସାରି ଜଙ୍ଗଲ ଭିତରେ ମାଂସ ଭାଗ କରୁଥିବା ସମୟରେ ସମ୍ପୃକ୍ତ ୫ ଜଣକୁ ଚଢ଼ାଉ କରି ଧରିଥିଲେ। ଘଟଣାସ୍ଥଳରୁ ବ୍ୟବହୃତ ଛୁରୀ, ଫାସ, କୁରାଢ଼ୀକୁ ମଧ୍ୟ ଜବତ କରିଥିଲେ। ବିଭାଗ ହାତରେ ଧରା ପଡିଥିବା ସମସ୍ତ ୫ଜଣ ଅଭିଯୁକ୍ତ ସାତକୋଶିଆ ରେଞ୍ଜ ଅନ୍ତର୍ଗତ ଦୁଆରଶୁଣୀ ଗାଁର ବୋଲି ସୂଚନା ମିଳିଛି। ଗିରଫ ଶିକାରୀ ମାନେ ହେଲେ କନ୍ଦା ବରଡ଼ା (୪୦),କାହ୍ନୁ ଚରଣ ବୁଲିଉଳି (୩୮) ,ବିଜୟ କୁମାର ବୁଲିଉଳି (୨୭) , କମଳା କାନ୍ତ ହୋ (୪୩) ,ସୋମନାଥ ବୁଲିଉଳି (୨୧) ବୋଲି ଜଣା ପଡ଼ିଛି। ଏ ସଂକ୍ରାନ୍ତରେ ସାତକୋଶିଆ ବନ୍ୟପ୍ରାଣୀ ବିଭାଗ କେଶ ନମ୍ବର ୧୨ ଅନୁଯାୟୀ ମାମଲା ରୁଜ୍ଜୁ କରି ତଦନ୍ତ ଜାରି ରଖିଛି।
Comments are closed.