ଦୁବାଇ: ଦୁବାଇ ଏୟାର ଶୋ’ ୨୦୨୫ରୁ ଓହରି ଯାଇଛି ଆମେରିକା ବାୟୁସେନା। ଶୁକ୍ରବାର ଭାରତୀୟ ବାୟୁସେନାର ତେଜସ ଯୁଦ୍ଧବିମାନ ଦୁର୍ଘଟଣା ହୋଇ ଜଣେ ପାଇଲଟ୍ଙ୍କର ମୃତ୍ୟୁ ହେବା କାରଣକୁ ନେଇ ଆମେରିକା ବାୟୁସେନା ଏପରି ନିଷ୍ପତ୍ତି ନେଇଛି। ଭାରତର ତେଜସ୍ ଯୁଦ୍ଧବିମାନ ଦୁର୍ଘଟଣା ହୋଇ ଜଣେ ପାଇଲଟଙ୍କର ମୃତ୍ୟୁ ହେବା ସତ୍ତ୍ବେ ଏହି ଏୟାର ଶୋ’କୁ ଚାଲୁ ରଖାଯାଇଥିଲା। ଜଣେ ପାଇଲଟଙ୍କର ମୃତ୍ୟୁ ପରେ ଏୟାର ଶୋ’କୁ ବନ୍ଦ କରାଯିବା ପରିବର୍ତ୍ତେ ଚାଲୁ ରଖିବା ଭଳି ନିଷ୍ପତ୍ତିକୁ ଆମେରିକା ବାୟୁସେନାର ପାଇଲଟ୍ ମେଜର ଟେଲର ଫେମା ହେଇଷ୍ଟର ନିନ୍ଦା କରିଛନ୍ତି।
ଆୟୋଜକଙ୍କ ଏପରି ନିଷ୍ପତ୍ତିକୁ ନେଇ ମେଜର ଟେଲର ଆଶ୍ଚର୍ଯ୍ୟ ପ୍ରକାଶ କରିଛନ୍ତି। ଟେଲର କହିଛନ୍ତି ଯେ ଜଣେ ପାଇଲଟଙ୍କ ମୃତ୍ୟୁ ଆମ ପାଇଁ ଅତ୍ୟନ୍ତ ଦୁଃଖଦାୟକ। ଭାରତୀୟ ପାଇଲଟ୍ଙ୍କ ପ୍ରତି ଶ୍ରଦ୍ଧାଞ୍ଜଳି ଓ ସମ୍ମାନ ଜଣାଇ ଆମେ ଏହି ଏୟାର େଶା’ରୁ ଓହରି ଯିବାକୁ ନିଷ୍ପତ୍ତି ନେଇଛୁ। ମେଜର ଟେଲର ଆମେରିକା ବାୟୁସେନାର ଏଫ-୧୬ ଭାଇପର ଶୋ’ ପ୍ରଦର୍ଶନ କରିବାକୁ ଥିବା ଟିମ୍ର ନେତୃତ୍ବ ନେଉଥିଲେ। ଏୟାର ଶୋ’ରେ ତାଙ୍କ ଟିମ୍ ଫାଇନାଲ ଶୋ’ ପ୍ରଦର୍ଶନ କରିବାକୁ ଥିଲା। ଫାଇନାଲ ଶୋ’ ପ୍ରଦର୍ଶନ ପାଇଁ ତାଙ୍କୁ ସୂଚନା ମିଳିବା ପରେ ଏପରି ଉଦ୍ବେଗ ପ୍ରକାଶ ପୂର୍ବକ ଏଥିରୁ ଓହରି ଯିବାକୁ ଘୋଷଣା କରିଛନ୍ତି। ଭାରତ ବାୟୁସେନାର ଯୁଦ୍ଧବିମାନ ତେଜସ୍ ଶୁକ୍ରବାର ଦୁର୍ଘଟଣାଗ୍ରସ୍ତ ହୋଇ ଜଳିଯାଇଥିଲା। ଏହାର ଚାଳକ ୱିଙ୍ଗକମାଣ୍ଡର ନମାଂଶ ଶ୍ୟାଲଙ୍କର ମୃତ୍ୟୁ ହୋଇଥିଲା।
