ଭୁବନେଶ୍ୱର : ଦୀର୍ଘ ୨୨ ଦିନ ହେଲା ଆନ୍ଦୋଳନ ଜାରି ରଖିଥିବା ରାଜ୍ୟର ବ୍ଲକଗ୍ରାଣ୍ଟ ଶିକ୍ଷକ ଓ ଅଧ୍ୟାପକମାନେ ଗୁରୁବାରଠାରୁ କାର୍ଯ୍ୟବନ୍ଦ ଆନ୍ଦୋଳନ ଆରମ୍ଭ କରିଛନ୍ତି । ରାଜ୍ୟର ସାଢେ ୫ ହଜାର ସ୍କୁଲରେ ତାଲା ପଡ଼ିଛି ।
ଅନ୍ୟପକ୍ଷରେ ୬ ଦଫା ଦାବିରେ ଓଡ଼ିଶା ପ୍ରାଥମିକ ଶିକ୍ଷକ ମହାସଙ୍ଘ ଗୁରୁବାର ରାଜଧାନୀରେ ମହାସମାବେଶର ଆୟୋଜନ କରିଛି । ଏହା ସହ ବିଧାନସଭା ଘେରାଉ କରିବାକୁ ଯୋଜନା ପ୍ରସ୍ତୁତ କରାଯାଇଛି ।
ତେବେ ସରକାର ଶିକ୍ଷକ ଆନ୍ଦୋଳନକୁ ଦମନ କରିବା ପାଇଁ ଉପାୟ ବାହାର କରିଛନ୍ତି। ଯେଉଁମାନେ ବିନା ନୋଟିସ୍ରେ ଯେଉଁମାନେ କାର୍ଯ୍ୟରେ ଯୋଗ ଦେଇ ନାହାଁନ୍ତି ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି । ବିଦ୍ୟାଳୟ ଓ ଗଣଶିକ୍ଷା ବିଭାଗ ସଚିବ ପ୍ରଦୀପ୍ତ ମହାପାତ୍ର ସମସ୍ତ ଜିଲ୍ଲା ଓ ବ୍ଲକ ଶିକ୍ଷାଧିକାରୀଙ୍କୁ ଚିଠି ଲେଖିଛନ୍ତି । ଯେଉଁମାନେ ବିନା ଅନୁମତିରେ ଅନୁପସ୍ଥିତ ଥିବେ ସେମାନଙ୍କର ଆଜି ଦିନର ଦରମା କଟା ଯିବ । ଚୁକ୍ତିଭିତ୍ତିକ ଶିକ୍ଷକଙ୍କ ପ୍ରତି ଅଧିକ କଠୋର ଆଭିମୁଖ୍ୟ ଗ୍ରହଣ କରାଯାଇଛି । ସେମାନଙ୍କ ଚାକିରିକୁ ଆସନ୍ତା ମାର୍ଚ୍ଚ ମାସରେ ନବୀକରଣ କରାଯିବ ନାହିଁ ବୋଲି ଚିଠିରେ ନିର୍ଦ୍ଦେଶ ରହିଛି ।
ମିଳିତ ପ୍ରାଥମିକ ଶିକ୍ଷକ ମହାସଙ୍ଘ, ଗ୍ରେଡ଼୍ ପେ ବୃଦ୍ଧି, ଠିକା ଶିକ୍ଷକଙ୍କୁ ୨୫ ପ୍ରତିଶତ ବର୍ଦ୍ଧିତ ଦରମା ପ୍ରଦାନ, ଏକ୍ସ କ୍ୟାଡ଼୍ର ଉଚ୍ଛେଦ, କ୍ରୀଡ଼ା ଶିକ୍ଷକଙ୍କୁ ବିଷୟ ଭିତ୍ତିକ ନିଯୁକ୍ତି ଓ ଅବସର ଶିକ୍ଷକଙ୍କୁ ପେନସନ୍ ଦେବା ଦାବି କରିଛି । ଏ ନେଇ ପୂର୍ବରୁ ବହୁ ବାର ଦାବି କରାଯାଇଥିଲେ ମଧ୍ୟ ସରକାର ଏଥିପ୍ରତି ଧ୍ୟାନ ଦେଇ ନାହାଁନ୍ତି । ତେଣୁ ରାଜ୍ୟର ୫୮ ହଜାର ସ୍କୁଲର ପ୍ରାୟ ଦେଢ ଲକ୍ଷ ଶିକ୍ଷକ ସମୂହ ଛୁଟିରେ ଆସି ଭୁବନେଶ୍ୱରରେ ମହାସମାବେଶରେ ଯୋଗ ଦେଇଛନ୍ତି। ଏହାକୁ ପ୍ରାଥମିକ ବିଏଡ଼୍ ସଂଘ, ଗଣ ଶିକ୍ଷା ସଂଘ ଓ ଶିକ୍ଷା ସହାୟକ ସଂଘ ସମର୍ଥନ ଜଣାଇଛନ୍ତି ।
ରାଜ୍ୟ ବିଧାନସଭାରେ ମଧ୍ୟ ଗୁରୁବାର ଶିକ୍ଷକମାନଙ୍କ ଦାବି ନେଇ ହଟ୍ଟଗୋଳ ହୋଇଛି। ସରକାର ଶିକ୍ଷକମାନଙ୍କ ସମସ୍ୟାର ସମାଧାନ କରିବାକୁ ତୁରନ୍ତ ପଦକ୍ଷେପ ନେବାକୁ ବିରୋଧୀ ଦଳ ପକ୍ଷରୁ ଦାବି କରାଯାଇଛି।
ଅନ୍ୟ ପକ୍ଷରେ ବ୍ଲକଗ୍ରାଂଟ ଶିକ୍ଷକ ଓ କର୍ମଚାରୀ କିଳିତ ମଞ୍ଚ ଆନ୍ଦୋଳନକୁ ବ୍ୟାପକ କରିବାକୁ ସ୍ଥିର କରିଛି । ବ୍ଲକର ସମସ୍ତ ଶିକ୍ଷକ , ଅଧ୍ୟାପକ ଓ ଶିକ୍ଷା କର୍ମଚାରୀ ପ୍ରତିଦିନ ଗୋଟିଏ ପଂଚାୟତରେ ଶୋଭାଯାତ୍ରା କରି ଘରଘର ବୁଲି ଲିଫଲେଟ୍ ବାଣ୍ଟିବା ସହ ଏହି ସମୟରେ ମଧ୍ୟାହ୍ନ ଭୋଜନ ବନ୍ଦ ରଖିବା ନେଇ ସ୍ଥିର ନେଇଛନ୍ତି ।
