ଡେସ୍କ: ଭାରତୀୟ ବଂଶୋଦ୍ଭବ ନାସା ମହାକାଶଚାରୀ ସୁନୀତା ୱିଲିୟମ୍ସ ଗତ ଜୁନ୍ ମାସରେ ୮ ଦିନିଆ ଯାତ୍ରା ପାଇଁ ବୋଇଂ ଷ୍ଟାରଲାଇନରରେ ପୃଥିବୀ ଛାଡ଼ିବା ପରେ ମାସ ମାସ ଧରି ମହାକାଶରେ ଫସି ରହିଛନ୍ତି। ଏବେ ନାସା ଆକଳନ କରିଛି ଯେ ୱିଲିୟମ୍ସ ଏବଂ ତାଙ୍କ ସାଥୀ ମହାକାଶଚାରୀ ବ୍ୟାରି ୱିଲମୋର ୨୦୨୫ ଫେବୃଆରୀ ପୂର୍ବରୁ ଫେରିପାରିବେ ନାହିଁ।
ମହାକାଶଚାରୀଙ୍କ ସ୍ୱାସ୍ଥ୍ୟକୁ ନେଇ ଚିନ୍ତା ବଢ଼ୁଥିବା ବେଳେ ଅନ୍ତର୍ଜାତୀୟ ମହାକାଶ ଷ୍ଟେସନର ଉପର ପାର୍ଶ୍ୱରୁ ନିଆଯାଇଥିବା ଏକ ଫଟୋରେ ସୁନିତାଙ୍କ ସ୍ୱାସ୍ଥ୍ୟବସ୍ଥା ଅତ୍ୟନ୍ତ ଖରାପ ଥିବା ଭଳି ଲାଗୁଛି। ଷ୍ଟାରଲାଇନର ମହାକାଶଯାନ ଖରାପ ହେବା ପରେ ଦୀର୍ଘ ସମୟ ଧରି ମହାକାଶରେ ରହିବା ପରେ ମହାକାଶଚାରୀମାନେ ସ୍ୱାସ୍ଥ୍ୟ ସଙ୍କଟର ସମ୍ମୁଖୀନ ହେଉଥିବା ନେଇ ଚର୍ଚ୍ଚା ହେଉଛି।
ଫଟୋ ଗୁଡ଼ିକରେ ସୁନିତାଙ୍କ ଓଜନ ହ୍ରାସ ଏବଂ ସମ୍ଭାବ୍ୟ ପୁଷ୍ଟିକର ଅଭାବ ବିଷୟରେ ଆଶଙ୍କା ସୃଷ୍ଟି କରିଛି ଯାହା ମହାକାଶଚାରୀମାନେ ଦୀର୍ଘ ସମୟ ଧରି ମହାକାଶରେ ରହିବା ସମୟରେ ସମ୍ମୁଖୀନ ହେଉଥିବା ଏକ ସାଧାରଣ ସମସ୍ୟା ଅଟେ। ଏହି ଫଟୋ ଗୁଡ଼ିକ ଚିନ୍ତାଜନକ ବୋଲି ଡାକ୍ତରମାନେ କହିଛନ୍ତି।
୨୦୨୫ ଫେବୃଆରୀରେ ଫେରିବାକୁ ଥିବା ମହାକାଶଚାରୀଙ୍କ ପାଖରେ ଖାଦ୍ୟ ସରିଯାଉଛି କି ନାହିଁ ତାକୁ ନେଇ ମଧ୍ୟ ପ୍ରଶ୍ନ ଉଠିଛି। ଅଗଷ୍ଟରେ ନାସା ସ୍ପଷ୍ଟ କରିଥିଲା ଯେ ଆଇଏସଏସରେ ପର୍ଯ୍ୟାପ୍ତ ବ୍ୟବସ୍ଥା ରହିଛି। ସ୍ପେସ୍ ଷ୍ଟେସନରେ କର୍ମଚାରୀଙ୍କୁ ଖାଦ୍ୟ, ପାଣି, ପୋଷାକ ଓ ଅମ୍ଳଜାନ ସମେତ ଆବଶ୍ୟକ ସମସ୍ତ ଜିନିଷ ମହଜୁଦ ରହିଛି। ନିକଟରେ ୨ଟି ମହାକାଶ ଯାନରେ ୮ ହଜାର ୨୦୦ ପାଉଣ୍ଡ ଖାଦ୍ୟ, ଇନ୍ଧନ ଓ ଅନ୍ୟାନ୍ୟ ସାମଗ୍ରୀ ମହାକାଶ ଷ୍ଟେସନକୁ ପଠାଯାଇଥିବା ନାସା କହିଛି।
Comments are closed.