ରେଙ୍ଗାଲିକ୍ୟାମ୍ପ: ପପଙ୍ଗା ଗ୍ରାମ ରୋଜଗାର ସେବକ(ଜିଆର୍ଏସ) ସୁଦାମ ସେଠଙ୍କ ସନ୍ଦେହଜନକ ମୃତ୍ୟୁ ଉପରୁ ପରଦା ହଟିଛି। ସୁଦାମଙ୍କୁ କେହି ହତ୍ୟା କରିନାହାନ୍ତି, ବରଂ ସେ ଆତ୍ମହତ୍ୟା କରିଥିବା ସ୍ପଷ୍ଟ ହୋଇଛି। ତାଙ୍କ ପକେଟରୁ ଏକ ସୁଇସାଇଡ୍ ନୋଟ ମିଳିଛି, ଯେଉଁଥିରେ ଲେଖାଯାଇଛି ଯେ, ମୋ ମୃତ୍ୟୁ ପାଇଁ ମୁଁ ନିଜେ ଦାୟୀ। ତେଣୁ ଏହା ଆତ୍ମହତ୍ୟା ବୋଲି ପୁଲିସ ପକ୍ଷରୁ ସ୍ପଷ୍ଟ କରାଯାଇଛି।
ଅତାବିରା ଥାନା ଅନ୍ତର୍ଗତ ଟିଙ୍ଗିପାଲି ଗ୍ରାମର ସୁଦାମ କୌଣସି ପ୍ରକାର ପେଟ ରୋଗରେ ଆକ୍ରାନ୍ତ ଥିଲେ। ତାଙ୍କ ରୋଗ ଭଲ ହେବ ନାହିଁ ବୋଲି ଡାକ୍ତରଙ୍କଠାରୁ ଶୁଣିବା ପରେ ସେ ମାନସିକ ଚାପରେ ରହୁଥିଲେ। ଗତ ଶନିବାର ସେ ଅଫିସ ଯାଉଥିବା କହି ଘରୁ ବାହାରି ଆସିଥିଲେ। ହେଲେ ଦେବାହାଲଠାରୁ ମାତ୍ର ୪୦୦ ମିଟର ଦୂର ଜହ୍ନାପଡ଼ା ରାସ୍ତାପାର୍ଶ୍ବ ଏକ ବୁଦା ଭିତରୁ ତାଙ୍କ ରକ୍ତାକ୍ତ ମୃତଦେହ ମିଳିଥିଲା। ତଦନ୍ତକାରୀ ଦଳ ତଦନ୍ତ କରିବା ସମୟରେ ତାଙ୍କ ପକେଟରୁ ହାତଲେଖା ଚିଠି ମିଳିଥିଲା। ଏହା ବ୍ୟତୀତ ଯୁବକଙ୍କ ପକେଟରେ ୭୨୦ ଟଙ୍କା ଥିବାବେଳେ ପାଖରେ ଏକ ବ୍ଲେଡ୍ ପଡ଼ିଥିଲା, ଯାହା ସାହାଯ୍ୟରେ ସେ ହାତ କାଟି ଆତ୍ମହତ୍ୟା କରିଥିଲେ। ରବିବାର ସକାଳେ ବ୍ୟବଚ୍ଛେଦ ପରେ ମୃତଦେହକୁ ପରିବାରକୁ ହସ୍ତାନ୍ତର କରାଯାଇଥିବା ଅତାବିରା ଥାନା ଅଧିକାରୀ ସୁକୁମାର ତ୍ରିପାଠୀଙ୍କଠାରୁ ସୂଚନା ମିଳିଛି।
