ନିଶ୍ଚିନ୍ତକୋଇଲି: କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା ଅସୁରେଶ୍ଵର ପଞ୍ଚାୟତର ଅଣସରପୁର ଗ୍ରାମର ଅଜୟ ସାହୁ ପ୍ରତିଦିନ ଭଳି ମଙ୍ଗଳବାର ସକାଳୁ ପୁଅ ଓ ପୁତୁରାକୁ ନେଇ ଅସୁରେଶ୍ଵର ଲୁଣାନଦୀର ପୁବଂଶ ଡାକବଙ୍ଗଳା ଘାଟକୁ ଗାଧୋଇବା ପାଇଁ ଯାଇଥିଲେ। ଗାଧୋଇବା ସମୟରେ ଗଭୀର ପାଣିରେ ଅଜୟଙ୍କ ପୁତୁରା ସୌମ୍ୟରଞ୍ଜନଙ୍କ ପାଦ ଅଚାନକ ଖସି ଯାଇଥିଲା । ଏହା ଦେଖି ବଡ଼ବାପା ଅଜୟ ପୁତୁରାକୁ ଉଦ୍ଧାର କରିବା ପାଇଁ ଗଭୀର ପାଣିକୁ ଡେଇଁ ପଡ଼ିଥିଲେ। ସବୁଠାରୁ ବିଡ଼ମ୍ବନାର ବିଷୟ ଅଜୟ ଡେଇଁବା ଦେଖି ପାଖରେ ଗାଧୋଉଥିବା ଦୁଇପୁଅ ମଧ୍ୟ ବାପାଙ୍କ ସହିତ ସେ ଗଭୀର ପାଣିକୁ ଡେଇଁ ପଡ଼ିଥିଲେ। ଅଜୟ ବହୁତ କଷ୍ଟକରି ଦୁଇ ପୁଅକୁ ଉଦ୍ଧାର କରିଥିଲେ। ହେଲେ ପୁତୁରା ସୌମ୍ୟରଞ୍ଜନ ନଦୀରେ ବୁଡି ଯାଇଥିଲେ ଓ ତାଙ୍କର ପତ୍ତା ମିଳିନଥିଲା। ଖବର ପାଇ ନିଶ୍ଚିନ୍ତକୋଇଲି ଅଗ୍ନିଶମ ବିଭାଗ କର୍ମଚାରୀମାନେ ଯାଇ ସୌମ୍ୟରଞ୍ଜନଙ୍କୁ ନଦୀରୁ ଉଦ୍ଧାର କରି ନିଶ୍ଚିତକୋଇଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ। ସେଠାରେ ଡକ୍ତର ତାଙ୍କୁ ମୃତ ଘୋଷଣା କରିଥିଲେ। ସୌମ୍ୟରଞ୍ଜନ ସପ୍ତମ ଶ୍ରେଣୀରେ ପାଠ ପଢୁଥିଲେ। ପରିବାର ଲୋକଙ୍କ ଅଭିଯୋଗ ପରେ ନିଶ୍ଚିତକୋଇଲି ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ମୃତଦେହକୁ ବ୍ୟବଚ୍ଛେଦ ପାଇଁ କଟକ ବଡ଼ମେଡିକାଲକୁ ପଠାଇଛି। ଲୁଣାନଦୀରେ ଗଭୀର ଭାବରେ ବିଲି ତାଡି ବିକ୍ରି କରୁଥିବାରୁ ସେଠାରେ ବଡ଼ବଡ଼ ଗଣ୍ଡ ହୋଇଯାଇଥିବା କାରଣରୁ ମୃତ୍ୟୁ ହୋଇଛି ବୋଲି ମୃତକଙ୍କ ବାପା ମନୋଜ କୁମାର ସାହୁ ଅଭିଯୋଗ କରିଛନ୍ତି।
Popular Categories
Previous article
Next article