ବାସୁଦେବପୁର: ଯୋଗ୍ୟ ହିତାଧିକାରୀଙ୍କୁ ମିଳୁନି ରାସନକାର୍ଡ ଓ ଆବାସ । ବ୍ୟାପକ ହେରଫେରକୁ ନେଇ ଧାରଣାରେ ବସିଲେ ଯୋଗ୍ୟ ହିତାଧିକାରୀ । ବାସୁଦେବପୁର ପଞ୍ଚାୟତ ସମିତିରେ ବାରମ୍ବାର ଅଭିଯୋଗ ହୋଇ ଆସୁଥିଲେ ହେଁ କୈାଣସି ସୁଫଳ ମିଳିପାରିନଥିବା କାରଣରୁ ଶେଷରେ ଯୋଗ୍ୟ ହିତାଧିକାରୀମାନେ ଯୁବ ନେତା ମାନସ ସାହୁଙ୍କ ନେତୃତ୍ବରେ ବିଡିଓଙ୍କ କାର୍ଯ୍ୟାଳୟ ସମ୍ମୁଖରେ ବସିଥବା ଦେଖିବାକୁ ମିଳିଥିଲା । ସୂଚନା ମୁତାବକ, ବାସୁଦେବପୁର ପଞ୍ଚାୟତ ସମିତି ଅଧିନ ଅରଣ୍ଡୁଆ ଓ ଏଡତାଳ ପଞ୍ଚାୟତର ଶତାଧିକ ହିତାଧିକାରୀ ସରକାରଙ୍କ ଆବାସ ଯୋଜନା ଓ ରାସନ କାର୍ଡରୁ ବର୍ଷ ବର୍ଷ ଧରି ବଞ୍ଚିତ ହୋଇ ରହିଛନ୍ତି । ଏନେଇ ବାରମ୍ବାର ସ୍ଥାନୀୟ ବିଡିଓଙ୍କ ସମେତ ଯୋଗାଣ ହୀତାଧିକାରୀଙ୍କ ନିକଟରେ ଅଭିଯୋଗ ହୋଇଥିଲା । ମାତ୍ର କୈାଣସି ସୁଫଳ ମିଳିପାନଥିବା କାରଣରୁ ନିରୁପାୟ ହୋଇ ଆଜି ଧାରଣାରେ ବସିବାକୁ ବାଧ୍ୟ ହୋଇଛନ୍ତି ବୋଲି ସରପଞ୍ଚଙ୍କ ପ୍ରତିନିଧି ମୁକ୍ତିକାନ୍ତ ନାୟକ କହିଛନ୍ତି ।
ଅନ୍ୟପଟେ ଏନେଇ ବିଡିଓ ସଞ୍ଜିବକୁମାର ସାହୁ କୁହନ୍ତି, ‘ମୁଁ ବାସୁଦେବପୁର ବିଡିଓ ଭାବରେ ଯୋଗ ଦେବା ପରଠାରୁ କୈାଣସି ପ୍ରକାରର ଅନିୟମିତତା କାର୍ଯ୍ୟକୁ ପ୍ରଶୟ ଦେଇନାହିଁ । ଯେତେବେଳେ କୈାଣସି ପ୍ରକାରର ଅଭିଯୋଗ ଆସିଛି ତାହାର ସମାଧାନ କରାଇବା ପାଇଁ ନିରନ୍ତର ଭାବରେ ପଦକ୍ଷେପ ନିଆଯାଇଛି । ଆଜିର ପରିସ୍ଥିତିକୁ ନେଇ ସମାଧାନ କରାଯିବା ସହିତ ଯୋଗ୍ୟ ହିତାଧିକାରୀମାନଙ୍କୁ ରାସନ କାର୍ଡ ଯୋଗାଇ ଦେବା ସହିତ ଆବସ ଯୋଜନାରେ ସାମିଲ କରାଯିବ ।‘ ଅଯୋଗ୍ୟମାନଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି ।
Comments are closed.