ବରଗଡ଼ : ଭେଡ଼େନ ଥାନାରେ ଗତକାଲି ଠାରୁ ଜିତୁ ନାଏକ ହତ୍ୟାକାରୀଙ୍କୁ ଗିରଫ କରିବା ଦାବିରେ ଧାରଣାରେ ବସିଥିବା ବୁର୍ଦା ଗ୍ରାମବାସୀ ଶେଷରେ ଧାରଣାରୁ ଓହରିଛନ୍ତି। ବୁଧବାର ରାତିରେ ବରଗଡ଼ ଏସ୍ପି ପଦ୍ମିନୀ ସାହୁ ଭେଡ଼େନ ଥାନାରେ ପହଞ୍ଚି ଧାରଣା ଦେଇଥିବା ପୀଡ଼ିତ ପରିବାର ସହିତ ଆଲୋଚନା କରିଥିଲେ। ଏସ୍ପି ଆନ୍ଦୋଳନକାରୀଙ୍କୁ ପୁଲିସକୁ ସହଯୋଗ କରିବା ପାଇଁ ଅନୁରୋଧ କରିଥିଲେ। ଜିତୁ ହତ୍ୟାକାଣ୍ଡରେ ଯେଉଁମାନେ ଅଭିଯୁକ୍ତ ବୋଲି ସନ୍ଦେହ କରୁଛନ୍ତି ସେମାନଙ୍କ ନାମ ପୁଲିସକୁ ଦିଅନ୍ତୁ ବୋଲି ଏସ୍ପି ଆନ୍ଦୋଳନକାରୀଙ୍କୁ କହିଥିଲେ। ପୁଲିସ ଉପଯୁକ୍ତ ତଦନ୍ତ କରି ଦୋଷୀ ବିରୁଦ୍ଧରେ ନିଶ୍ଚିତ ଭାବେ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଏସ୍ପି ଆଶ୍ଵସନା ଦେଇଥିଲେ । ଜିତୁ ହତ୍ୟାକାଣ୍ଡ ମାମଲାରେ ପୂର୍ବରୁ ଜଣେ ପୁଲିସ ଅଧିକାରୀ ତଦନ୍ତ ଦାୟିରେ ଥିବାବେଳେ ଏବେ ୫ଜଣ ପୁଲିସ ଅଧିକାରୀଙ୍କୁ ନେଇ ଏକ ତଦନ୍ତକାରୀ ଟିମ ଗଠନ କରାଯିବ ବୋଲି ଏସପି କହିଥିଲେ । ଏସପିଙ୍କ ପ୍ରତିଶ୍ରୁତି ପରେ ଗ୍ରାମବାସୀ ଧାରଣାରୁ ହଟିଥିଲେ । ଆଲୋଚନା ସମୟରେ ବକଟି ସରପଞ୍ଚ ଗୌର ଦନ୍ତା, ମାର୍କଣ୍ଢ ସେଠୀ, ଦିଲୀପ ରଥ, ଟାଉନ ଥାନା ଆଇଆଇସି ସଦାନନ୍ଦ ପୂଜାରୀ ପ୍ରମୁଖ ଉପସ୍ଥିତ ଥିଲେ ।
Comments are closed.