ଚନ୍ଦ୍ରଶେଖରପୁର : ଅପରାଧ ନିୟନ୍ତ୍ରଣ ପାଇଁ କମିସନରେଟ ପୁଲିସ ପକ୍ଷରୁ ରାଜଧାନୀର ପ୍ରବେଶ ପଥର ଚାରିପଟୁ ବାରିକେଟ ଦେଇ ‘ଚେକ୍ କ୍ରାଇମ’ ଆରମ୍ଭ ହୋଇଛି । ଏହା ଦ୍ୱାରା ଅପରାଧିମାନେ ମନଇଛା ରାତିରେ ବୁଲିବା, ମଦ୍ୟପମାନେ ନିଶା ଖାଇ ଗାଡ଼ି ଚଳାଇବା ଆଦି ବିଭିନ୍ନ କ୍ଷେତ୍ରରେ ରୋକ ଲାଗିବା ସହିତ ଭୋର ୪ଟା ପର୍ଯ୍ୟନ୍ତ ଏଭଳି ବ୍ଲକିଂଚେକିଂ ଚାଲୁ ରହିବ ବୋଲି ଅତିରିକ୍ତ ଡ଼ିସିପି କିଶୋର ପାଣିଗ୍ରାହୀ କହିଛନ୍ତି।
ମୁଖ୍ୟତଃ କମିସନରେଟ ପୁଲିସ ଜୋନ-୬ ଏସିପି ରମେଶ ଚନ୍ଦ୍ର ବିଶୋଇଙ୍କ ତତ୍ୱବଧାନରେ ୪ଟି ଥାନା ଚନ୍ଦ୍ରଶେଖରପୁର, ଇନ୍ଫୋସିଟି, ନନ୍ଦନକାନନ, ଚନ୍ଦକା ପୁଲିସ ମିଳିତ ଭାବେ କଟକ-ଭୁବନେଶ୍ୱରର ସମସ୍ତ ପ୍ରବେଶ ପଥକୁ ବାରିକେଟ ଦ୍ୱାରା ବନ୍ଦକରି ଏକାଧିକ ଛକରେ ବ୍ଲକିଂଚେକିଂ ସହିତ ମଦ୍ୟପ ଗାଡ଼ି ଚାଳକଙ୍କୁ କଡ଼ାକଡ଼ି ଯାଂଚ କରାଯାଉଛି । କେବଳ ସେତିକି ନୁହେଁ ବିନା ହେଲମେଟରେ ଗାଡ଼ି ଚଳାଇବା, ଗାଡ଼ିର କାଗଜପତ୍ର ମଧ୍ୟ ଯାଞ୍ଚ ଆରମ୍ଭ ହୋଇଛି। ଏକା ସମୟରେ ଚନ୍ଦ୍ରଶେଖରପୁର ଏକାଧିକ ପ୍ରମୁଖ ଛକରେ ପୃଥକ ଭାବେ ଜୋରଦାର ଯାଞ୍ଚ କରାଯାଉଛି। ଯାହାକି ରାଜଧାନୀରେ ବଢୁଥିବା ଅପରାଧିଙ୍କ କାର୍ଯ୍ୟକଳାପ ଉପରେ ପୁଲିସ ତିକ୍ଷ୍ଣ ନଜର ରଖିବା ଏବଂ ଏହାଦ୍ୱାରା ଅପରାଧ ନିୟନ୍ତ୍ରଣ ହେବା ଆଶା ରଖାଯାଉଛି ବୋଲି ଜଣେ ପୁଲିସ ଅଧିକାରୀ କହିଛନ୍ତି।
