କୁକୁର କାମୁଡ଼ାରେ ନାବାଳିକା ମୃତ

ଲକ୍ଷେ୍ନø: ଉତ୍ତରପ୍ରଦେଶ ସୀତାପୁର ଜିଲା ମହେଶପୁର-ଚିଲ୍‍ୱାର ଗ୍ରାମରେ ବୁଲା କୁକୁର କାମୁଡ଼ାରେ ରୀନା ନାମ୍ନୀ ଜଣେ୧୦ ବର୍ଷର ଝିଅର ମୃତ୍ୟୁ ଘଟିଛି। ତିନି ସାଥୀଙ୍କ ସହିତ ଆମ୍ବ ତୋଳିବାକୁ ଯାଇଥିବା ବେଳେ ସେମାନେ ବୁଲା କୁକୁର ଆକ୍ରମଣର ଶିକାର ହୋଇଥିଲେ। ଅନ୍ୟ ତିନି ଜଣ କୌଣସି ଉପାୟରେ ଖସି ଆସିଥିଲେ ମଧ୍ୟ ରୀନା ବର୍ତ୍ତି ପାରିନଥିଲେ। ଗାଁ ଲୋକେ ରୀନାଙ୍କୁ ଉଦ୍ଧାର କରି ଡାକ୍ତରଖାନାକୁ ନେଇଥିଲେ। କିନ୍ତୁ ସେଠାରେ ଡାକ୍ତର ରୀନାଙ୍କୁ ମୃତ ଘୋଷଣା କରିଥିଲେ। ସମସ୍ୟାର ସମାଧାନ ପାଇଁ ଜିଲା ପ୍ରଶାସନ ବିହିତ ପଦକ୍ଷେପ ନେଉ ନ ଥିବାରୁ ଗାଁ ଲୋକେ ରୀନାଙ୍କ ଶବ ରଖି ଜାତୀୟ ରାଜପଥ ଅବରୋଧ କରିଥିଲେ। ଜିଲା ପ୍ରଶାସନ ପଦକ୍ଷେପ ନ ନେଲେ କୁକୁର ନିପାତ ପାଇଁ ଲୋକମାନେ ଉଦ୍ୟମ କରିବେ ବୋଲି ଚେତାବନୀ ଦେଇଛନ୍ତି।
୨୦୧୭ ନଭେମ୍ବର ୧ ତାରିଖରୁ ଏ ପର୍ଯ୍ୟନ୍ତ ସେହି ଗ୍ରାମରେ କୁକୁର କାମୁଡ଼ାରେ ୧୩ ଜଣଙ୍କ ମୃତ୍ୟୁ ଘଟି ସାରିଲାଣି। ସେମାନଙ୍କ ମଧ୍ୟରୁ ଗତ ୧ ତାରିଖରୁ ୭ ଜଣଙ୍କ ମୃତ୍ୟୁ ଘଟିଥିବା ବେଳେ ୬ ଜଣ ଆକ୍ରାନ୍ତ ହୋଇଛନ୍ତି। ଗତ ଦୁଇ ଦିନ ତଳେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସୀତାପୁର ଜିଲା ଗସ୍ତ କରି ପରିସ୍ଥିତି ଅନୁଧ୍ୟାନ କରିବା ସହିତ ବିହିତ ପଦକ୍ଷେପ ନେବା ଲାଗି ଜିଲା ପ୍ରଶାସନକୁ ନିର୍ଦେଶ ଦେଇଛନ୍ତି। ଶିଶୁ ଓ ନାବାଳକଙ୍କୁ ବାହାରକୁ ନ ଛାଡ଼ିବା ପାଇଁ ପ୍ରଶାସନ ଲୋକଙ୍କୁ ପରାମର୍ଶ ଦେଇଛି। ଲୋକଙ୍କୁ ବୁଝାଇବା ପାଇଁ ସୀତାପୁର ଜିଲାପାଳ ଶୀତଲ ବର୍ମା ବିଡିଓ, ସରପଞ୍ଚ, ଡାକ୍ତର, ଶିକ୍ଷକଙ୍କୁ କହିଛନ୍ତି।