ଡେସ୍କ: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଶନିବାର ସନ୍ଧ୍ୟାରେ ଅନୁଷ୍ଠିତ ରାଜ୍ୟ କ୍ୟାବିନେଟ ବୈଠକରେ ୭ଟି ପ୍ରସ୍ତାବକୁ ଅନୁମୋଦନ ମିଳିଛି। ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କ୍ୟାବିନେଟ ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି। ସେ କହିଛନ୍ତି ଯେ କ୍ୟାବିନେଟ ବୈଠକରେ ଗୋସମ୍ପଦ ବୀମା ଯୋଜନା ପାଇଁ ୧୮୭.୪୨ କୋଟି ଟଙ୍କା ବ୍ୟୟ କରାଯିବ। ଏଥିରେ ୧୫ ଲକ୍ଷ ୪୭ ହଜାର ୮୩୭ ଗୋପାଳଙ୍କ ଉପକୃତ ହେବେ। ଯୋଜନାରେ ଗୋପାଳନ, ସୁରକ୍ଷା ଓ ଦୁଗ୍ଧ ଉତ୍ପାଦନକୁ ଗୁରୁତ୍ୱ ଦିଆଯିବ। ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ଦୁଗ୍ଧ ଉପାଦାନକୁ ଜାତୀୟ ସ୍ତରରେ ପହଞ୍ଚାଇବା ପାଇଁ ପଦକ୍ଷେପ ଗ୍ରହଣ କରାଯିବ। ମଇଁଷି ପାଳନ ସମେତ ଗୋ ସମ୍ପଦ ବୀମା ନିମନ୍ତେ ରାଜ୍ୟ ସରକାର ୮୫% ଅର୍ଥ ପ୍ରଦାନ କରିବେ। ଅନ୍ୟ ପକ୍ଷରେ ଆଗାମୀ ୫ ବର୍ଷରେ ୧ ହଜାର ୪୨୩ କୋଟି ଟଙ୍କାର ସହାୟତା ରାଶି ପ୍ରଦାନ କରିବା ପ୍ରସ୍ତାବକୁ କ୍ୟାବିନେଟ ଅନୁମୋଦନ ଦେଇଛି।
କ୍ୟାବିନେଟ ମଞ୍ଜୁରୀ ମିଳିଥିବା ଅନ୍ୟ ପ୍ରସ୍ତାବଗୁଡିକ ମଧ୍ୟରେ ଓଡ଼ିଶା ଉଚ୍ଚ ନ୍ୟାୟାଳୟର କର୍ମଚାରୀଙ୍କ ପାଇଁ ୫୫୦ଟି କର୍ମଚାରୀ ବାସଗୃହ ନିର୍ମାଣ କରାଯିବ। ୩୦ ମାସ ମଧ୍ୟରେ ଏହାର ନିର୍ମାଣ ସମ୍ପୂର୍ଣ୍ଣ କରିବା ନିମନ୍ତେ ଲକ୍ଷ୍ୟ ରଖାଯାଇଛି। ଏହା ବ୍ୟତୀତ ସାଧାରଣ ବଣ୍ଟନ ବ୍ୟବସ୍ଥାରେ ଘରୋଇ ଡିଲରଙ୍କ ଲାଇସେନ୍ସ ଅବଧି ଆଉ ଦେଢ଼ ବର୍ଷ ବୃଦ୍ଧି କରାଯାଇଛି। ଅନ୍ୟ କେତେକ ନିଷ୍ପତ୍ତି ମଧ୍ୟରେ ପରିସଂଖ୍ୟାନ ବିଭାଗର ତଥ୍ୟ ବିତରଣ ନିୟମରେ ସଂଶୋଧନ ପ୍ରସ୍ତାବ ଓ ବରିଷ୍ଠ ବିଚାରପତି ନିଯୁକ୍ତି ନିୟମରେ ସଂଶୋଧନ ସମ୍ପର୍କିତ ପ୍ରସ୍ତାବକୁ ମଧ୍ୟ ମଞ୍ଜୁରୀ ମିଳିଛି।
