ମଥୁରା : ମଥୁରାରେ ଭଗବାନ ଶ୍ରୀକୃଷ୍ଣଙ୍କ ବିଜେସ୍ଥଳୀ ଜମିର ମାଲିକାନା ବିବାଦରେ ପ୍ରତିବାଦୀମାନେ ବୁଧବାର ଜିଲ୍ଲା ଜଜ୍ କୋର୍ଟରେ ହାଜର ହୋଇନଥିଲେ। ଯାହା ଫଳରେ ମାମଲାର ଶୁଣାଣି ବର୍ତ୍ତମାନ ଡିସେମ୍ବର ୧୦ ପର୍ଯ୍ୟନ୍ତ ସ୍ଥଗିତ ରଖାଯାଇଛି। ଏହି ମାମଲାରେ ଶ୍ରୀକୃଷ୍ଣ ଜନ୍ମସ୍ଥାନ ଟ୍ରଷ୍ଟ ଏବଂ ଇଦଗା ଟ୍ରଷ୍ଟର ଅଧିକାରୀ ଉଭୟଙ୍କୁ ପକ୍ଷଭୁକ୍ତ କରାଯାଇଛି।
ସିଭିଲ୍ ସିନିୟର ଜଜ୍ ଡିଭିଜନ୍ କୋର୍ଟରେ ପ୍ରଭୁ ଶ୍ରୀକୃଷ୍ଣଙ୍କ ବିଜେସ୍ଥଳୀ ତଥା ତାଙ୍କ ଜନ୍ମସ୍ଥାନର ମାଲିକାନା ଦାବି କରି ମାମଲା ଦାଖଲ ହୋଇଥିଲା, କିନ୍ତୁ ଏହାର ଶୁଣାଣି ସମୟରେ ଦାବି ଏବଂ ଦସ୍ତାବେଜ ଉପସ୍ଥାପନ କରାଯାଇ ନ ଥିଲା। ପରବର୍ତ୍ତୀ ସମୟରେ ତାଙ୍କ ଓକିଲମାନେ ଜିଲ୍ଲା ଜଜ୍ କୋର୍ଟରେ ଏକ ଦାବି ଉପସ୍ଥାପନ କରିଥିଲେ। ଯେଉଁଠାରେ ଏହାକୁ ଗ୍ରହଣ କରାଯାଇଥିଲା। ବିରୋଧୀ ଶ୍ରୀକୃଷ୍ଣ ଜନ୍ମସ୍ଥାନ ସେବା ସଚିବ ତଥା ନ୍ୟାସ ଶ୍ରୀକୃଷ୍ଣ ଜନ୍ମଭୂମି ଟ୍ରଷ୍ଟ ଏବଂ ଇଦଗା ଟ୍ରଷ୍ଟକୁ ପ୍ରତିବାଦୀ ଭାବେ ଦର୍ଶାଯାଇଛି।
ଅଭିଯୋଗକାରୀଙ୍କ ଓକିଲମାନେ ଦାବି କରିଛନ୍ତି ଯେ ୧୩.୩୭ ଏକର ଜମିର ମାଲିକାନା ଭଗବାନ କୃଷ୍ଣଙ୍କ ଭଗବାନ ଶ୍ରୀକୃଷ୍ଣଙ୍କ ବିଜେସ୍ଥଳୀର ହୋଇଥିବାବେଳେ ୧୨ ଅକ୍ଟୋବର ୧୯୬୮ରେ, କଟରା କେଶବ ଦେବ, ଶ୍ରୀ କୃଷ୍ଣ ଜନ୍ମସ୍ଥାନ ସୋସାଇଟି, ମସଜିଦ ଇଦଗା କମିଟି ସହିତ ଜମିର ବୁଝାମଣାରେ ସ୍ୱାକ୍ଷର କରିଥିଲେ। ଏହି ଜମିକୁ ଜବର ଦଖଲ କରାଯାଇ ମସଜିଦ ନିର୍ମାଣ କରାଯାଇଛି। ତେଣୁ ବୁଝାମଣା ବାତିଲ ସହିତ ୧୩.୩୭ ଏକର ଜମିର ମାଲିକାନା ପାଇଁ ଆବେଦନ କରାଯାଇଛି।
