ଆଠଗଡ : ଆଠଗଡର ଜଣାଶୁଣା ସମାଜସେବୀ ତଥା ସହରର ହେମମାଳପୁର ସାହିର ଅନ୍ୟତମ ମୁରବୀ ସୁର ଜେନା(୯୧) ଙ୍କର ରବିବାର ବିଳମ୍ବିତ ରାତିରେ ପରଲୋକ ହୋଇଯାଇଛି । ବାର୍ଦ୍ଧକ୍ୟ ଜନିତ ରୋଗରେ ପଡି ଚିକିତ୍ସାଧୀନ ଅବସ୍ଥାରେ ନିଜ ବାସଭବନରେ ତାଙ୍କର ପରଲୋକ ହୋଇଥିଲା । ଗତ ୧ତାରିଖରେ ଛାତରୁ ପଡି ଆହତ ହୋଇ ଚିକିତ୍ସାଧିନ ଅବସ୍ଥାରେ ତାଙ୍କ ପତ୍ନୀଙ୍କର ପରଲୋକ ହୋଇଥିଲା। ସୁର ଜେନା କଟକ କେନ୍ଦ୍ର ସମବାୟ ବ୍ୟାଙ୍କ ନିର୍ଦ୍ଦେଶକ ଓ ଶିଳ୍ପ ବିଭାଗ ଅଧିନ ଆଠଗଡ ସମବାୟ କାଷ୍ଠ ଶିଳ୍ପ ସମିତିର ସଂପାଦକ ଥିଲେ । ପୂର୍ବତନ ମୁଖ୍ୟମନ୍ତ୍ରୀ ଜାନକୀ ପଟ୍ଟନାୟକଙ୍କର ଜଣେ ଦୃଢ ସମର୍ଥକ ଥିବା ଶ୍ରୀ ଜେନା ୧୯୮୫-୯୦ ପର୍ଯ୍ୟନ୍ତ ଆଠଗଡ ଏନଏସିର ୧ନଂ ୱାର୍ଡ କାଉନସିଲର ଥିବା ସମୟରେ ତାଙ୍କ ଅଞ୍ଚଳର ବହୁ ବିକାଶ ମୂଳକ କାର୍ଯ୍ୟ କରିଥିଲେ। ପରେ ସେ ବିଜୁ ଜନତା ଦଳରେ ଯୋଗଦାନ କରିଥିଲେ। ମୃତ୍ୟୁଶଯ୍ୟା ନିକଟରେ ତାଙ୍କର ପୁଅ, ବୋହୂ, ନାତି ନାତୁଣୀ ଓ ପରିବାର ସଦସ୍ୟ ଉପସ୍ଥିତ ଥିଲେ। ବହୁ ମାନ୍ୟଗଣ୍ୟ ବ୍ୟକ୍ତି ହେମମାଳପୁରସ୍ଥିତ ତାଙ୍କ ବାସଭବନରେ ପହଞ୍ଚି ଶେଷଦର୍ଶନ କରିବା ସହ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ତାଙ୍କ ମରଶରୀରକୁ ଏକ ଶୋଭାଯାତ୍ରାରେ ସାହି ପରିକ୍ରମା ପରେ ଗ୍ରାମ ଶ୍ମଶାନରେ ଶେଷକୃତ୍ୟ ସଂପନ୍ନ ହୋଇଥିବାବେଳେ ବଡପୁଅ ରଞ୍ଜନ ମୁଖାଗ୍ନି ଦେଇଥିଲେ।
Comments are closed.