ଭୁବନେଶ୍ୱର : ଭୁବନେଶ୍ୱର ବିମାନବନ୍ଦରରୁ ଗୁରୁବାର ଏକ ନାଗ ସାପ ଉଦ୍ଧାର ହୋଇଛି। ସ୍ନେକ୍ ହେଲ୍ପ ଲାଇନ ସଦସ୍ୟ ଓ ଏୟାରପୋର୍ଟ ଫାୟାର ବ୍ରିଗେଡ଼ର ମିଳିତ ସହଯୋଗରେ ସାପଟିକୁ ଉଦ୍ଧାର କରାଯାଇଛି।
ସୂଚନା ଅନୁସାରେ, ଏୟାରପୋର୍ଟର ବାଥରୁମରେ ଏକ ନାଗ ସାପ ଗତ ରାତିରେ ପଶିଥିଲା । ତେବେ କିଛି କରିବା ପୂର୍ବରୁ ସାପଟି ବେସିନ ତଳେ ଥିବା ଜାଲି ଭାଙ୍ଗି ଯାଇଥିବାରୁ ସେଇ ପଟେ ପଶିଗଲା । କିନ୍ତୁ ପୁଣି ଆଜି ଦିନ ୧୦ ଟାରେ ସେଇ ରୁମର ବାହାର ପଟ ପାଇପ ଦେଇ ସାପ ମୁଣ୍ଡ ବାହାର କରିବା ଦେଖାଗଲା । ଏହାପରେ ଏୟାରପୋର୍ଟ କର୍ତ୍ତୃପକ୍ଷ ସ୍ନେକ ହେଲ୍ପ ଲାଇନର ସାହାଯ୍ୟ ଲୋଡ଼ିଥିଲେ । ସ୍ନେକ ହେଲ୍ପ ଲାଇନର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ଘଟଣା ସ୍ଥଳରେ ପହଞ୍ଚି ଯେତେ ଉପାୟ କଲେ ମଧ୍ୟ ସାପ ଆଉ ବାହାରି ନଥିଲା । ବାଥ୍ ରୁମର ଭିତର ପଟୁ ଫିନାଇଲ, ଏସିଡ, ଏମିତିକି ପେଟ୍ରୋଲ ମଧ୍ୟ ଢାଳିବା ପରେ ସାପର ଟେର ମିଳିଲା ନାହିଁ । ଶେଷରେ ଏୟାରପୋର୍ଟର ଫାୟାର ବ୍ରିଗେଡ଼ ଗାଡି ଆସି ଭିତର ପଟୁ ଉଚ୍ଚ ଚାପ ଦେଇ ପାଣି ମାଡ଼ କରିବା ପରେ ଅଧ ମିନିଟ ମଧ୍ୟରେ ୩ ଫୁଟ ଲମ୍ବର ନାଗ ସାପଟି ପାଇପ ମୁହଁ ଦେଇ ବହାରକୁ ଆସିଥିଲା । ଶୁଭେନ୍ଦୁ ତତକ୍ଷଣାତ ସାପଟିକୁ ନିଜର ସ୍ନେକ ହୁକ ସାହାଯ୍ୟରେ ଦୂରକୁ ଛାଟି ଦେଇଥିଲେ । ସାପଟି ଏକ ବେଙ୍ଗ ମଧ୍ୟ ଖାଇଥିଲା, ଯାହାକୁ ସଙ୍ଗେ ସଙ୍ଗେ ବାନ୍ତି ମଧ୍ୟ କରି ଦେଇଥିଲା । ଏହାପରେ ସାପଟିକୁ ବ୍ୟାଗ ଭିତରେ ରଖି ଦେଇଥିଲେ ଶୁଭେନ୍ଦୁ । ସାପଟିକୁ ସହର ବାହାରେ ତାର ପ୍ରାକୃତିକ ଆବାସ ସ୍ଥଳୀରେ ଛାଡି ଦିଆଯାଇଛି ।
ତେବେ ସାପଟି ବାଥ ରୁମର ବେସିନ ତଳେ ଜାଲି ନ ଥିବାରୁ ପାଇପ ଭିତରେ ପସିବାରେ ସମର୍ଥ ହୋଇଥିଲା ଏବଂ ସେହି ବେସିନ ତଳ ଜାଲିକୁ ନୂଆ କରି ଫିଟିଙ୍ଗ କରିଦେଲେ ଆଉ ସାପ ଭୟ ରହିବ ନାହିଁ ବୋଲି ଶୁଭେନ୍ଦୁ ଏୟାରପୋର୍ଟ କର୍ମଚାରୀମାନଙ୍କୁ ବୁଝାଇଥିଲେ ।
