ସିଙ୍ଗାପୁର : ଭାରତର ପିଭି ସିନ୍ଧୁ ଏଠାରେ ଚାଲିଥିବା ସିଙ୍ଗାପୁର ଓପନ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟରେ ମହିଳା ସିଙ୍ଗଲ୍ସ ସେମିଫାଇନାଲରୁ ବିଦାୟ ନେଇଛନ୍ତି। ଶନିବାର ଖେଳାଯାଇଥିବା ଏହି ମ୍ୟାଚରେ ୨ୟ ସିଡ୍ ମାନ୍ୟତାପ୍ରାପ୍ତ ଜାପାନର ନୋଜୋମି ଓକୁହାରା ସିଧାସଳଖ ୨୧-୭, ୨୧-୧୧ ଗେମରେ ୪ର୍ଥ ସିଡ୍ ସିନ୍ଧୁଙ୍କୁ ପରାସ୍ତ କରିଛନ୍ତି। ସିନ୍ଧୁଙ୍କ ପରାଜୟ ସହ ଚଳିତ ଟୁର୍ଣ୍ଣାମେଣ୍ଟରେ ଭାରତୀୟ ଅଭିଯାନ ଶେଷ ହୋଇଛି।
ଶନିବାର ୩୭ ମିନିଟ ଧରି ଚାଲିଥିବା ଏହି ସେମିଫାଇନାଲ ମୁକାବିଲାରେ ସିନ୍ଧୁ ତାଙ୍କ ପ୍ରତିପକ୍ଷଙ୍କ ନିକଟରେ ଏକପ୍ରକାର ଆତ୍ମସମର୍ପଣ କରିଥିଲେ। ୨୦୧୭ ବିଶ୍ବ ଚମ୍ପିଆନସିପ୍ ଫାଇନାଲରେ ଏ ଦୁଇ ଖେଳାଳିଙ୍କ ମଧ୍ୟରେ ପ୍ରାୟ ଦୁଇ ଘଣ୍ଟା ଧରି କଡା ମୁକାବିଲା ଦେଖିବାକୁ ମିଳିଥିଲା। ତେବେ ଆଜିର ଲଢେଇ ଭାରତୀୟ ବ୍ୟାଡମିଣ୍ଟନପ୍ରେମୀଙ୍କୁ ସମ୍ପୂର୍ଣ୍ଣ ନିରାଶ କରିଛି। ପ୍ରଥମ ଗେମକୁ ୭-୨୧ରେ ହାରିବାପରେ ସିନ୍ଧୁ ନିଜର ଆତ୍ମବିଶ୍ବାସ ହରାଇଥିଲେ। ଦ୍ବିତୀୟ ଗେମରେ ସିନ୍ଧୁ ଉନ୍ନତ ପ୍ରଦର୍ଶନ ଜରିଆରେ ମ୍ୟାଚକୁ ପ୍ରତ୍ୟାବର୍ତ୍ତନ କରିବାକୁ ଉଦ୍ୟମ କରିଥିଲେ ସୁଦ୍ଧା ଓକୁହାରାଙ୍କ ଉଚ୍ଚକୋଟୀର ଖେଳ ଉପରେ ଏହାର କୌଣସି ପ୍ରଭାବ ପଡିନଥିଲା। ଏଥରକୁ ମିଶାଇ ଉଭୟ ଖେଳାଳି ପରସ୍ପରକୁ ୧୩ ଥର ଭେଟିଥିବାବେଳେ ଫଳାଫଳ ସିନ୍ଧୁଙ୍କ ସପକ୍ଷରେ ୭-୬ ରହିଛି।
ରବିବାର ଖେଳାଯିବାକୁ ଥିବା ଫାଇନାଲରେ ଓକୁହାରା ବିଶ୍ବର ୧ ନମ୍ବର ଖେଳାଳି ଚାଇନିଜ ତାଇପେର ତାଇ ଜୁ ୟିଙ୍ଗ୍ଙ୍କୁ ଭେଟିବେ। ଶନିବାର ଅନ୍ୟ ଏକ ସେମିଫାଇନାଲରେ ୟିଙ୍ଗ୍ ୧୫-୨୧, ୨୪-୨୨, ୨୧-୧୯ ଗେମରେ ୩ୟ ସିଡ୍ ଜାପାନର ଆକାନେ ୟାମାଗୁଚିଙ୍କୁ ପରାସ୍ତ କରିଛନ୍ତି।
Comments are closed.