ପୁଅ ବାପାକୁ ମାରି ମାଟିରେ ପୋତିବା ଘଟଣା; ଘରକୁ ଫେରିଲା ନିଖୋଜ ମାଆ
![](https://samajalive.in/wp-content/uploads/2024/06/champa-750x430.jpg)
ସିମୁଳିଆ: ବାପା ପ୍ରଭାକର ବେହେରାଙ୍କ ମୃତଦେହ ଶୁକ୍ରବାର ଘର ପଛପଟ ଚାଷ ଜମିରୁ ଉଦ୍ଧାର ହେବା ପରେ ନିଖୋଜ ମାଆ ଚମ୍ପା ବେହେରାଙ୍କୁ ଖୋଜିବା ଆରମ୍ଭ କରିଥିଲା ସିମୁଳିଆ ପୁଲିସ। ଶେଷରେ ସମସ୍ତ କଳ୍ପନା ଜଳ୍ପନାର ଅନ୍ତ ଘଟାଇ ଏକ ଅଟୋରେ ସୋମବାର ଘରକୁ ଫେରିଛି ମାଆ ଚମ୍ପା।
ସୂଚନାରୁ ପ୍ରକାଶ, ବାଲେଶ୍ବର ଜିଳା ସିମୁଳିଆ ଥାନା ଅନ୍ତର୍ଗତ ଗରସଙ୍ଗ ଗ୍ରାମରେ ଜମିବାଡ଼ି ବିବାଦକୁ ନେଇ ପୁଅ ରମେଶ ଚନ୍ଦ୍ର ବେହେରା ବାପା ପ୍ରଭାକର ବେହେରାଙ୍କୁ ହତ୍ୟା କରି ବିଲରେ ପୋତି ଦେଇଥିବାବେଳେ ମାଆ ଚମ୍ପା ବେହେରା ନିଖୋଜ ଥିଲେ। ଏହି ଘଟଣା ପୁଲିସର ନିଦ ହଜାଇ ଦେଇଥିଲା। କାରଣ ପୁଅ ମାଆକୁ ମାରି ବିଲରେ ପୋତିଦେଇଥିବା ନେଇ ପୁଲିସକୁ ସନ୍ଦେହ ଘାରିଥିଲା । ତେବେ ସେହି ସନ୍ଦେହରେ ରବିବାର ସିମୁଳିଆ ପୁଲିସ ପକ୍ଷରୁ ଏକ ଜେସିବି ସାହାଯ୍ୟରେ ବିଲରେ ଖୋଜିବା ଆରମ୍ଭ କରିଥିଲା। ମାତ୍ର ପୁଲିସ ହାତରେ ସେଭଳି କିଛି ସୁରାକ ଲାଗି ନ ଥିଲା । ବାପା, ମାଆ ନିଖୋଜ ନେଇ ଝିଅ ମମତା ମଲ୍ଲିକ ସିମୁଳିଆ ଥାନାରେ ଅଭିଯୋଗ କରିଥିଲେ। ମମତାଙ୍କ ଅଭିଯୋଗ ଆଧାରରେ ପୁଲିସ ତଦନ୍ତ କରି ଶୁକ୍ରବାର ରମେଶଙ୍କ ଘର ପଛପଟେ ବାପାଙ୍କ ମୃତଦେହ ବିଲରେ ପୋତା ହୋଇଥିବା ଅବସ୍ଥାରେ ଉଦ୍ଧାର କରିଥିଲା। ମାଆ ନିଖୋଜ ନେଇ ପରିବାର ଲୋକ ଓ ଗ୍ରାମବାସୀ ଆଶଙ୍କାରେ ଥିବାବେଳେ ଘଟଣାର ୮ଦିନ ବିତିଯାଇଥିବାରୁ ଅଭିଯୁକ୍ତ ପୁଅକୁ ଧରିବାରେ ସଫଳ ନ ହେବା ପୁଲିସର ମୁଣ୍ଡ ବିନ୍ଧାର କାରଣ ପାଲଟିଥିଲା । ମାତ୍ର ସମସ୍ତ ଆଶା ଆଶଙ୍କାର ଅନ୍ତ ଘଟାଇ ଆଜି ଏକ ଅଟୋ ସାହାଯ୍ୟରେ ଘରେ ଆସି ପହଞ୍ଚିଛନ୍ତି ମାଆ ଚମ୍ପା। ଚମ୍ପାଙ୍କୁ ଦେଖିବା ପାଇଁ ଗ୍ରାମରେ ପ୍ରବଳ ଜନଗହଳି ଦେଖିବାକୁ ମିଳିଥିଲା। ଖବର ପାଇ ପୁଲିସ ଘଟଣା ସ୍ଥଳରୁ ଚମ୍ପାଙ୍କୁ ନିଜ ହେପାଜତକୁ ନେଇ ହତ୍ୟା ଘଟଣାର ତଦନ୍ତ ଜାରି ରଖିଛି ।
Comments are closed.