ସମ୍ବଲପୁର : ସହରରେ ଜଣ୍ଡିସ ପରିସ୍ଥିତିକୁ ନେଇ ସମୀକ୍ଷା କରିଛନ୍ତି ସମ୍ବଲପୁର ବିଧାୟକ ଜୟନାରାୟଣ ମିଶ୍ର । ମଙ୍ଗଳବାର ସମ୍ବଲପୁର ଜିଲା ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟର ସମ୍ମିଳନୀ କକ୍ଷରେ ଆୟୋଜିତ ସମୀକ୍ଷା ବୈଠକରେ କଣ ପାଇଁ ସମ୍ବଲପୁର ସହରରେ ଜଣ୍ଡିସ ରୋଗ ଦେଖାଗଲା ଏବଂ ଏହାର ନିରାକରଣ ପାଇଁ କଣ ପଦକ୍ଷେପ ନିଆଯାଇଛି ବୋଲି ପ୍ରଶ୍ନ କରିବା ସହିତ ସ୍ଥିତିର ସମୀକ୍ଷା କରିଥିଲେ । ବୈଠକରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ସୁଜାତା ମିଶ୍ର, ଅତିରିକ୍ତ ଜିଲାପାଳ ଅଜାମ୍ବର ମହାନ୍ତି, ମହାନଗର ନିଗମ ଅଧିକାରୀଙ୍କ ସମେତ ଜିଲାପାଳ ଓ ଜିଲା ସ୍ୱାସ୍ଥ୍ୟ ବିଭାଗର ଅଧିକାରୀ ମାନେ ଉପସ୍ଥିତ ରହିଥିଲେ ।
ଏହି ଅବସରରେ ବିଧାୟକ ଶ୍ରୀ ମିଶ୍ର କହିଛନ୍ତି ଯେ, ଏ ପର୍ଯ୍ୟନ୍ତ ୯୩ ଜଣ ଜଣ୍ଡିସ ରୋଗୀ ଚିହ୍ନଟ ହୋଇଥିବା ବେଳେ ଏହା କେଉଁଥି ପାଇଁ ବ୍ୟାପୁଛି ତାହାର କାରଣ ଖୋଜା ଚାଲିଛି । ତେବେ ଦୂଷିତ ଜଳ ବ୍ୟବହାର ସହିତ ବୁଲାବିକାଳିଙ୍କ ଖାଦ୍ୟ ଖାଇବାରୁ ଜଣ୍ଡିସ ରୋଗ ବ୍ୟାପିଛି। ଏବେ ଜଣ୍ଡିସକୁ ରୋକିବାକୁ ସବୁ ପ୍ରକାରର ପଦକ୍ଷେପ ନିଆଯାଉଛି ବୋଲି ବିଧାୟକ କହିଛନ୍ତି ।
