ପୁରୀ : ସୁପ୍ରିମକୋର୍ଟରେ ବୁଧବାର ଶ୍ରୀମନ୍ଦିର ପରିଚାଳନା ସଂସ୍କାର ଓ ଭକ୍ତଙ୍କ ଶୃଙ୍ଖଳିତ ଦର୍ଶନ ମାମଲାର ଶୁଣାଣି କରାଯିବ। କୋର୍ଟମିତ୍ର ଗୋପାଳ ସୁବ୍ରମଣ୍ୟମ ରିପୋର୍ଟ ଦାଖଲ କରିବା ସମ୍ଭାବନା ରହିଛି। ମୃଣାଳିନୀ ପାଢୀଙ୍କ ଚିଠିକୁ ଭିତ୍ତିକରି ରୁଜୁ ହୋଇଥିବା ଏହି ମୋକଦ୍ଦମାରେ ପକ୍ଷଭୁକ୍ତ ହେବାକୁ କେତେକ ସେବକ ନିଯୋଗ ଆବେଦନ କରିଛନ୍ତି। ଶ୍ରୀମନ୍ଦିରରେ ଧାଡିଦର୍ଶନ ବ୍ୟବସ୍ଥାକୁ ବିରୋଧ କରି ଗତ ୩ ତାରିଖ ଦିନ ପୁରୀରେ ହିଂସାକାଣ୍ଡ ଘଟିଥିବାରୁ ଆସନ୍ତା କାଲିର ଶୁଣାଣିକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି। ମିଳିଥିବା ସୂଚନା ଅନୁଯାୟୀ ଜଷ୍ଟିସ୍ ମଦନ ବି. ଲୋକୁର ଏବଂ ଜଷ୍ଟିସ୍ ଦୀପକ ଗୁପ୍ତାଙ୍କ ଖଣ୍ଡପୀଠରେ ମୋକଦ୍ଦମାର ଶୁଣାଣି କରାଯିବ। ଉଭୟପକ୍ଷର ଯୁକ୍ତି ଶୁଣିବା ପରେ କୋର୍ଟ ପରବର୍ତ୍ତୀ ନିର୍ଦେଶ ପ୍ରଦାନ କରିବା ସମ୍ଭାବନା ରହିଛି। ଜିଲାଜଜ୍ଙ୍କ ୧୨ଟି ସୁପାରିସ କାର୍ଯ୍ୟକାରୀ ସମ୍ପର୍କରେ ଶ୍ରୀମନ୍ଦିର ପ୍ରଶାସନ ଓକିଲ କୋର୍ଟଙ୍କୁ ଅବଗତ କରାଇବେ। ଭକ୍ତଙ୍କ ଶୃଙ୍ଖଳିତ ଦର୍ଶନ, ସେବକଙ୍କ ବଂଶାନୁକ୍ରମିକ ସେବାସ୍ୱତ୍ୱ ଉଚ୍ଛେଦ, ସେବକଙ୍କ ଦ୍ୱାରା ଦାନଦକ୍ଷିଣା ଆଦାୟ ବନ୍ଦ, ଧାଡିଦର୍ଶନ ବ୍ୟବସ୍ଥା, ସେବକ ଓ କର୍ମଚାରୀଙ୍କୁ ପରିଚୟପତ୍ର ପ୍ରଦାନ ସମ୍ପର୍କରେ ଶୁଣାଣି ହେବାର ସମ୍ଭାବନା ରହିଛି।
