୨୨ ମାସ ଶିଶୁର ଦେଢ ଲକ୍ଷ ସପିଙ୍ଗ୍‍

ନୂଆଦିଲ୍ଲୀ : ସପିଙ୍ଗ କରିବା ସଭିଁଙ୍କୁ ପସନ୍ଦ। ତାହା ପୋଷାକ ହେଉ ଅଥବା ଅନ୍ୟ ଜିନିଷ। ତେବେ ଯୁବକ,ଯୁବତୀ ସପିଙ୍ଗ କରିବା ସାଧାରଣ କଥା। ମାତ୍ର ଏକ ୨୨ ମାସ ଶିଶୁର ୧ ଲକ୍ଷ ୫୦ ହଜାରର ସପିଙ୍ଗ। କଥାଟା ଶୁଣିବାକୁ କାନକୁ ଆଶ୍ଚର୍ଯ୍ୟ ଲାଗିଲେ ମଧ୍ୟ ସତ। ଉକ୍ତ ଶିଶୁ ନିଜ ମାଆଙ୍କ ଫୋନରୁ ୨ ,୦୦୦ ଡଲାର ପ୍ରାୟ ଦେଢଲକ୍ଷ ଟଙ୍କାର ଜିନିଷ ଅନଲାଇନରେ ଅର୍ଡର କରିଥିବା ଜଣାପଡିଛି। ତେବେ ଜିନିଷ ଅର୍ଡର କରିବା ପରେ ଏହା ଘରେ ପହଞ୍ଚିଥିବା ପରେ ଶିଶୁର ବାପା ଓ ମାଆ ଉଭୟ ଆଶ୍ଚର୍ଯ୍ୟ ହୋଇଯାଇଥିଲେ। ସେମାନେ ଚିନ୍ତାରେ ପଡିଯାଇଥିଲେ ପୁଅ କିପରି ଏଭଳି କରିବ। ତେବେ ଏହା ପଛର ଘଟଣା ଖୁବ ରୋମାଞ୍ଚକର। ଏହି ଘଟଣା ଆମେରିକା ନ୍ୟୁଜର୍ସେରେ ରହୁଥିବା ଜଣେ ଭାରତୀୟ ଦମ୍ପତିଙ୍କର। ସେମାନେ ସୋସିଆଲ ମିଡିଆରେ ଏହି ଘଟଣାକୁ ସେୟାର କରିଛନ୍ତି। ଦମ୍ପତିଙ୍କ କହିବାନୁଯାୟୀ, ସେମାନେ ନିଜ ନୂଆ ଘର ପାଇଁ ଫର୍ଣ୍ଣିଚର କିଣିବାର ରହିଥିଲା। ଏହି କାରଣରୁ ମହିଳା ଜଣଙ୍କ ନିଜ ଫୋନରେ  ଏକ ସ୍ୱତନ୍ତ୍ର ୱେବ ସାଇଟ୍‍ ରେ କିଛି ଫର୍ଣ୍ଣିଚର ଖୋଜି ରଖିଥିଲେ। ଘରର ଠିକଣା ମଧ୍ୟ ସେଥିରେ ରହିଥିଲା। ମାତ୍ର ସେ ଜିନିଷ ଅର୍ଡର କରିନଥିଲେ। ଅଜାଣତରେ ତାଙ୍କ ପୁଅ ଫୋନଟିକୁ ନେଇ ସେ ସମସ୍ତ ଜିନିଷକୁ ଅର୍ଡର କରିଥିଲେ।  ଦମ୍ପତି ଏ ବିଷୟରେ କିଛି ମଧ୍ୟ ଜାଣିନଥିଲେ। ଘରକୁ ଗୋଟେ ପରେ ଗୋଟ ଫର୍ଣ୍ଣିଚର ଆସିବା ପରେ ତାହାର ମୂଲ୍ୟ ପାଖାପାଖି ଦେଢଲକ୍ଷ ଟଙ୍କା ହୋଇଥିଲା। ସେହି ସମୟରେ ଶିଶୁଙ୍କ ମାଆ ନିଜ ଫୋନ ଦେଖିବାରୁ ସମ୍ପୂର୍ଣ୍ଣ ଘଟଣା ବୁଝିପାରିଥିଲେ। ଘଟଣା ପରେ ମହିଳା ଜଣଙ୍କ ନିଜର ଭୁଲ ବୁଝିବା ସହ ସମସ୍ତ ବୈଦ୍ୟୁତିକ ଉପକରଣ ପ୍ରତି ଅଧିକ ରୁ ଅଧିକ ଧ୍ୟାନ ଦେବେ ବୋଲି କହିଛନ୍ତି। ଏହାସହ ଉକ୍ତ ଫର୍ଣ୍ଣିଚରକୁ ସେହି ୱେବ ସାଇଟ ଅନୁଯାୟୀ ଦୋକାନରେ ଫେରସ୍ତ କରିବା ସହ ଟଙ୍କା ଫେରି ପାଇବେ ବୋଲି ସୂଚନା ମିଳିଛି।